Հայաստանը չի մասնակցի ՀԱՊԿ-ի «Կոբալտ-2024» հերթական զորավարժությանը, որը Ռոսգվարդիայի ղեկավարությամբ անցնելու է օգոստոսի 14-16–ը Նովոսիբիրսկում։

«Օգոստոսի 14-ին Ռուսաստանի Ազգային գվարդիայի զորքերի դաշնային ծառայության ղեկավարությամբ Նովոսիբիրսկի շրջանում, գերատեսչության ուսումնական կենտրոնի բազայի վրա, տեղի կունենա «Կոբալտ-2024» զորավարժությունների բացումը, որին կմասնակցեն հրամանատարության և ՀԱՊԿ արագ արձագանքման հավաքական ուժերի վերահսկման ստորաբաժանումները և հատուկ նշանակության ստորաբաժանումները։ Զորավարժությունները կավարտվեն օգոստոսի 16-ին»,- ասվում է հաղորդագրության մեջ, հայտնում է ՏԱՍՍ–ը։

Միջոցառմանը կմասնակցեն դրանցով հետաքրքրված երկրների՝ ՌԴ–ի, Բելառուսի, Ղազախստանի, Տաջիկստանի և Ղրղզստանի ներկայացուցիչները։

Երեք օր զորավարժությունների մասնակիցները փորձի փոխանակում կկատարեն և կբարելավեն հատուկ նշանակության ստորաբաժանումների միջև փոխգործակցության հմտությունները։

Վերջին շրջանում Հայաստանը չի մասնակցում ՀԱՊԿ զորավարժություններին և այլ միջոցառումներին, ինչպես նաև չի ֆինանսավորում կառույցը։

«Վարչապետն ասել է, որ մենք կորոշենք՝ երբ դուրս կգանք, մենք կորոշենք, բայց հետ չենք գնա՝ ոչ պակաս, ոչ էլ ավելի։ Եթե որևէ մեկը պնդում է, որ ՀՀ վարչապետն ասել է՝ Հայաստանը դուրս է գալիս ՀԱՊԿ-ից, սխալվում է»,- ասել էր Միրզոյանը։