Հայաստանը մասնակցելու է BRICS-ի գագաթնաժողովին։ Այդ մասին ԱԺ-ում լրագրողների հետ զրույցում ասել է ԱԳ փոխնախարար Մնացական Սաֆարյանը։

Գագաթնաժողովն անցկացվելու է հոկտեմբերի 22-24-ը՝ Կազանում։

Անդրադառնալով Բաքվի հետ բացվող կոմունիկացիաների վերահսկողությունը մասնավոր պահնորդական ընկերությանը վստահվելու խոսակցություններին, նա ասել է, որ դեռ մանրամասները հայտնի չեն, գրում է Panorama.am-ը։

«Այդ մասին խոսվել է, դեռ մանրամասները հայտնի չեն: Դա «Խաղաղության խաչմերուկ» նախագծի հետ որևէ կապ չունի, բայց դրա տրամաբանության մեջ է։ «Խաղաղության խաչմերուկի» սկզբունքները նույնն են, պարզապես խոսվել է դրա հնարավորության մասին»,–ասել է նա։

Փոխնախարարը նշել է, որ որևէ հավելյալ տեղեկատվություն այս պահին առկա չէ։

Սաֆարյանը հիշեցրել է, որ խաղաղության պայմանագրի 10-րդ փաթեթն են փոխանցել Ադրբեջանին:

BRICS-ը ձևավորվել է 2006–ի հունիսին, որի կազմում էին ի սկզբանե Բրազիլիան, Ռուսաստանը, Հնդկաստանը, Չինաստանը, Հարավային Աֆրիկան։ 2024–ի հունվարի 1-ից: BRICS–ին միացել է ևս 5 պետություններ՝ Եգիպտոսը, Իրանը, ԱՄԷ–ն, Սաուդյան Արաբիան և Եթովպիան: Ադրբեջանը պաշտոնապես հայտ է ներկայացրել BRICS-ին միանալու համար։