ՌԴ նախագահ Վլադիմիր Պուտինը ԲՐԻԿՍ–ի գագաթնաժողովում ՀՀ վարչապետ Նիկոլ Փաշինյանի ելույթից հետո ասել է, որ ՀՀ և Ադրբեջանի միջև սահմանազատումը ճիշտ ճանապարհ է դեպի խաղաղություն։
«Շատ հաճելի է նշել, որ սկսվել է Հայաստանի ու Ադրբեջանի միջև սահմանների սահմանազատման և սահմանագծման գործընթացը։ Դա ճիշտ ճանապարհ է դեպի խաղաղության պայմանագիր»,- ասել է նա, գրում է ՏԱՍՍ–ը։
Պուտինը նաև նշել է, որ սահմանազատման հանձնաժողովների վավերացումից հետո ՀՀ–ն ու Ադրբեջանը կկարողանան ակտիվացնել սահմանազատման գործընթացը։
Նա նաև դրական է գնահատել այն, որ Հայաստանը պատրաստ է լոգիստիկ նախագծեր իրականացնել Ադրբեջանի հետ։
Վարչապետ Նիկոլ Փաշինյանը ԲՐԻԿՍ 16-րդ գագաթնաժողովի լիագումար նիստում իր ելույթում հայտարարել է, որ ՀՀ–ն Ադրբեջանին առաջարկել է սահմանային և մաքսային հսկողության պարզեցված ընթացակարգերի մեխանիզմներ Նախիջևանի հետ կապի համար։
Նա նշել է, որ բոլոր պնդումները, թե Հայաստանը ինչ-որ ձևով համաձայնել է, որ երրորդ երկիրն ապահովի հաղորդակցությունների անվտանգությունն իր ինքնիշխան տարածքում, կամ որ դա նշված է ինչ-որ փաստաթղթում, չեն համապատասխանում իրականությանը:
