Ադրբեջանից Հայաստանի հասցեին պարբերաբար հնչող պահանջներին միացել է ևս մեկը։ Ադրբեջանի նախագահի օգնական Հիքմետ Հաջիևը հայտարարել է, թե ԵՄ առաքելության գործունեությունը ՀՀ–ում պետք է ավարտվի։

Ըստ նրա, Բաքուն ԵՄ որևէ առաքելության ներկայության անհրաժեշտություն հայ–ադրբեջանական սահմանին չի տեսնում, գրում է Minval.az-ը։

«Այդ առաքելության գործունեությունը պետք է ավարտվի։ Առաքելության տեղակայումը համաձայնեցվել էր Պրահայում ՝ Ադրբեջանի նախագահ Իլհամ Ալիևի, Ֆրանսիայի նախագահ Էմանուել Մակրոնի, ինչպես նաև ԵՄ խորհրդի նախագահ Շառլ Միշելի և ՀՀ վարչապետ Նիկոլ Փաշինյանի մասնակցությամբ։ Այդ առաքելությունը նախատեսվում էր որպես կարճաժամկետ։ Սակայն, ինչպես տեսնում ենք, այն վերածվում է մշտական առաքելության, դրա կազմն ու աշխարհագրությունն ընդլայնվում են»,–ասել է նա։

Նա հավելել է, որ սահմանազատման գործընթացին երրոդ կողմի մասնակցության անհրաժեշտություն Բաքվում չեմ տեսնում, քանի որ այն անցնում է «ՀՀ և Ադրբեջանի միջև փոխադարձ ընկալման և խաղաղության պայմաններում»։

«Մենք չենք համարում, որ ԵՄ առաքելությունը գործոն է, որը նպաստում է խաղաղության ամրապնդմանը տարածաշրջանում։ Հակառակը՝ նրա ներկայությունը մտահոգություն է առաջացնում»,–ասել է Հաջիևը։

Սա վերջին շրջանում ադրբեջանական կողմից ներկայացվող արդեն 5–րդ պահանջն է ՀՀ–ին։

Միայն վերջին օրերին Ադրբեջանի իշխանությունների տարբեր ներկայացուցիչներ մի շարք պահանջներ են ներկայացրել ՀՀ–ին՝ ԱԳ փոխնախարար Էլնուր Մամեդովի հնչեցրած՝ միջազգային ատյաններում հայցերից հրաժարվելու պահանջից բացի, ԱԳ նախարար Բայրամովը ԵԱՀԿ–ում խոսել է ՀՀ Սահմանադրությունը փոխելու և ԵԱՀԿ Մինսկի խումբը լուծարելու անհրաժեշտության մասին, իսկ այդ երկրի նախագահ Իլհամ Ալիևը հայտարարել է, թե ՀՀ–ն պետք է երկխոսություն սկսի այսպես կոչված «արևմտյան Ադրբեջանի» համայնքի հետ, որի տակ հարևան երկրում հասկանում են ՀՀ գրեթե ամբողջ տարածքը, այդ թվում՝ Երևանը։