ՀՀ Ազգային ժողովի նախագահ Ալեն Սիմոնյանը, ով աշխատանքային այցով Իտալիայում է, հանդիպել է այդ երկրի Պատգամավորների պալատի արտաքին հարաբերությունների հանձնաժողովի նախագահ Ջուլիո Տրեմոնտիի, փոխնախագահ Պաոլո Ֆորմենտինիի և հանձնաժողովի այլ անդամների հետ։

Սիմոնյանն իտալացի գործընկերների ուշադրությունը հրավիրել է Ադրբեջանում պահվող հայ ռազմագերիների վերադարձի խնդրի վրա՝ ընդգծելով դրա հրատապությունն ու կարևորությունը։

Հանդիպման ընթացքում, բացի հայ-իտալական համագործակցությանը և միջխորհրդարանական կապերին առնչվող հարցերից, քննարկման առանցքում եղել են Հայաստանի եվրոպական ինտեգրման գործընթացը, ինչպես նաև Հայաստանի և Ադրբեջանի միջև նախատեսվող խաղաղության պայմանագրին վերաբերող հարցերը։

Վարչապետ Նիկոլ Փաշինյանը հայտարարել է, որ Բաքվի բանտում պահվող Արցախի նախկին ռազմաքաղաքական ղեկավարներին հոգեմետ նյութեր են տալիս: Նա հավելել է, որ այդ մասին կան հետախուզական տվյալներ և որ նպատակը էսկալացիա հրահրելն է։ Բաքուն ժխտում է այդ մեղադրանքները։