ՀՀ արդարադատության նախարար Սրբուհի Գալյանն ընդունել է ՀՀ-ում Չեխիայի Հանրապետության արտակարգ և լիազոր դեսպան Պետր Պիրունչիկին` երկուստեք ընդգծվել է երկկողմ համագործակցության կարևորությունը, և կողմերը հայտնել են պատրաստակամություն այն առավել խորացնելու։ Քննարկվել են քրեական գործերով իրավական օգնության շրջանակում առկա գործակցության մանրամասները։
Նախարարը նշել է, որ Հայաստանի ապագան ուղղորդվում է եվրոպական արժեքներով ու ստանդարտներով, և բարեփոխումները ևս իրականացվում են այդ ուղղությամբ։ Նա հավելել է, որ Հայաստան-ԵՄ համագործակցությունը նոր փուլ է մտել, որտեղ արդարադատության նախարարությունն ունի իր նշանակալի դերը։
Դեսպանի խնդրանքով Սրբուհի Գալյանը ներկայացրել է նախարարության առաջնահերթությունները՝ անդրադառնալով դատաիրավական բարեփոխումներին, դատարանների ծանրաբեռնվածության հարցին, ինչպես նաև գործերի մակագրման գործընթացին։
Քննարկվել են նաև սահմանադրական բարեփոխումները, և նախարարը նշել է, որ Սահմանադրության նոր տեքստը նախատեսվում է ավարտել մինչև 2026 թվականի խորհրդարանական ընտրությունները։
Հանդիպման ավարտին կողմերը հաստատել են իրենց պատրաստակամությունը շարունակել և խորացնել համագործակցությունը։
