Երկրորդ համաշխարհային պատերազմի ժամանակ Ֆրանսիական դիմադրության շարժման անվանի մարտիկ, Ֆրանսիայի ազգային հերոս Միսաք Մանուշյանի պուրակում կտեղադրվի նրա կիսանդրին։ Այդ մասին ֆեյսբուքյան իր էջում հայտնել է Երևանի քաղաքապետ Տիգրան Ավինյանը։

«Միսաք Մանուշյանի անունը հավերժացել է հայ և համաշխարհային պատմության մեջ՝ որպես ազատության, արդարության և մարդու իրավունքների համար պայքարի խորհրդանիշ։ Նրա հիշատակը հավերժացնելու նպատակով Երևանում՝ Միսաք Մանուշյանի անվան պուրակում, կտեղադրվի նրա կիսանդրին»,–նշել է նա։

Ավինյանը տեղեկացրել է, որ կիսանդրու ստեղծման համար անցկացված բաց մրցույթին մասնակցել է 10 քանդակագործ, որոնցից հաղթող է ճանաչվել Սարգիս Բաբայանի ներկայացրած աշխատանքը։ Քաղաքապետը նշել է, որ այն լավագույնս արտահայտում է Մանուշյանի կերպարի ուժն ու նրա գաղափարները։

«Այս նախաձեռնությամբ ևս մեկ անգամ ընդգծում ենք մեր հարգանքը Մանուշյանի հիշատակի և նրա թողած արժեքների հանդեպ»,- հավելել է Ավինյանը։

Ֆրանսիայի նախագահ Էմանուել Մակրոնի որոշմամբ Միսաք Մանուշյանը վերահուղարկավորվել է Պանթեոնում։