Արցախի Հանրապետության ներկայացուցչության շենքը բանկում, վարկային կազմակերպությունում, որևէ այլ մարմնում կամ անհատի մոտ գրավադրված չէ։ Այդ մասին ֆեյսբուքյան իր էջում հայտնել է արցախցի փաստաբան Ռոման Երիցյանը։

«Արցախի Հանրապետության նախագահի հանձնարարությամբ կատարել եմ փաստաբանական հարցումներ ու իրականացրել այլ ուսումնասիրություններ և ստացել հստակ տեղեկություններ, ինչպես նաև պաշտոնական պատասխան՝ նշածս գույքի նկատմամբ գրանցված գրավի իրավունքի բացակայության մասին։

Հետևաբար ներկայացուցչության շենքը ՀՀ կառավարությանն անցնելու կամ վարկի դիմաց Արցախի չորրորդ նախագահի կողմից գրավադրված լինելու տեղեկությունները մտածացին են ու ոչ իրական։

Իհարկե ՀՀ կառավարությունն ունակ է ցանկացած ստորության, այդ թվում՝ սեփականության իրավունքի բացահայտ խախտման, բայց վստահ եղեք, որ անձամբ ես իրավական և ցանկացած այլ եղանակով խոչընդոտելու եմ Արցախի համար այլևս խորհրդանշական համարվող այդ շենքը ՀՀ կառավարությանն անցնելու քայլերին»,–ասվում է գրառման մեջ։

Նա հավելել է, որ «Փաստինֆոյի» լրագրողի հարցերին պատասխանելիս ապրիլի 29–ին ինքն էլ է խոսել շենքը գրավադրված լինելու ոչ հստակ տեղեկության և ՀՀ կառավարության կողմից այն յուրացնելու հնարավորության մասին։

«Այնուամենայնիվ, տեղեկությունը, հուրախություն արցախցիների, չհաստատվեց։ Վստահեցնում եմ, որ Փաստինֆոն այն լրատվականներից չէ, որը դիտավորությամբ կարող է տարածել կեղծ լուրեր»,- գրել է Երիցյանը։

Ազատության հրապարակում բողոքի ակցիա իրականացնող արցախցիներն ընդունել են որոշում՝ իրենց շտաբ-վրանը տեղափոխել Երևանում գործող Արցախի ներկայացուցչության տարածք։ Այդ մասին լրատվամիջոցների հետ զրույցում հայտնել է Արցախցիների իրավունքների պաշտպանության խորհրդի անդամ Նժդեհ Իսկանդարյանը։