Պերուի մայրաքաղաք Լիմայում ընթացող պատանիների և երիտասարդների ծանրամարտի աշխարհի առաջնության շրջանակում Հայաստանի ներկայացուցիչ Ալեքսանդրա Գրիգորյանը որին մարզում է Քրիստինե Պետրոսյանը, 55 կգ քաշային կարգում դարձել է բրոնզե մեդալակիր։

Նա հաջողություն է գրանցել պոկում վարժությունում՝ վեր բարձրացնելով սկզբում 85 կգ, ապա՝ 88 կգ, հայտնում է Հայաստանի ծանրամարտի ֆեդերացիան։

Հրում վարժությունում Ալեքսանդրան կարողացել է գլխավերևում պահել 116 կգ, ինչի արդյունքում նա գրանցել է լավագույն արդյունքը՝ նվաճելով այդ վարժության ոսկե մեդալը։

Երկամարտի արդյունքը կազմել է 204 կգ, ինչը Ալեքսանդրա Գրիգորյանին ապահովել է բրոնզե մեդալ երիտասարդների աշխարհի առաջնությունում։

Երիտասարդական հավաքականը մարզում են Մելիք Ղուկասյանը և Դավիթ Մուրադյանը, պատանեկան թիմը՝ Երվանդ Կիրակոսյանը, իսկ կանանց հավաքականը ղեկավարում է Տարոն Թոմվասյանը։