TikTok տեսահարթակը պարտավոր է վճարել 530 միլիոն եվրոյի տուգանք՝ եվրոպացի օգտատերերի տվյալները չինական իշխանություններին փոխանցելու համար։ Չինական ByteDance կոնցեռնի դուստր ընկերությունը ճանաչվել է ԵՄ-ի Ընդհանուր տվյալների պաշտպանության կանոնակարգի (GDPR) խախտման մեղավոր, ինչպես հայտնել է Իռլանդիայի տվյալների պաշտպանության հանձնաժողովը (DPC)։

TikTok-ը հայտարարել է, որ մտադիր է բողոքարկել այս որոշումը, հայտնում է Deutsche Welle-ն։

DPC-ի փոխնախագահ Գրեհեմ Դոյլը նշել է, որ TikTok-ը չի կարողացել «ստուգել, ապահովել և ապացուցել, որ եվրոպացի օգտատերերի անձնական տվյալները պաշտպանված են ԵՄ-ում երաշխավորված մակարդակին համարժեք»։

Նրա խոսքով՝ ընկերությունը հաշվի չի առել Չինաստանի իշխանությունների կողմից Եվրոպայից տվյալներին հասանելիության հնարավորությունը՝ ՉԺՀ-ի ահաբեկչության և լրտեսության դեմ պայքարի օրենքների շրջանակում։

DPC-ն սկսել է TikTok-ի կողմից տվյալների փոխանցման թույլատրելիության հետաքննությունը 2021 թվականին։ Հետաքննության ավարտից քիչ առաջ՝ ապրիլին, ընկերությունը անսպասելիորեն հայտարարել է, որ եվրոպացի օգտատերերի տվյալները պահվել են Չինաստանում, սակայն հետագայում դրանք ջնջվել են։ 530 միլիոն եվրոյի տուգանքը DPC-ի կողմից երբևէ սահմանված ամենամեծ տուգանքներից մեկն է։ Ընկերությունը ունի վեց ամիս՝ իր գործունեությունը ԵՄ-ի կանոնակարգերին համապատասխանեցնելու համար։

Սա TikTok-ի առաջին տուգանքը չէ։ 2023 թվականին DPC-ն ընկերությանը տուգանել է 345 միլիոն եվրոյով՝ անչափահասների տվյալների մշակման ժամանակ ԵՄ-ի կանոնների խախտման համար։ TikTok-ի եվրոպական գլխավոր գրասենյակը գտնվում է Իռլանդիայում, ուստի իռլանդական մարմինը հանդես է գալիս որպես այս սոցիալական ցանցի հիմնական կարգավորողը Եվրոպայում, ինչպես նաև Google, Meta և X ընկերությունների համար։

Գերմանիայի թվային տեխնոլոգիաների նախարար Ֆոլքեր Վիսսինգը ողջունել է DPC-ի որոշումը։

«Մեր եվրոպական կանոնները գործում են բոլորի համար՝ ներառյալ միջազգային թվային կոնցեռնները։ Խոսքը վերաբերում է երեխաների և երիտասարդների պաշտպանությանն, ինչպես նաև մեր արժեքները հետևողականորեն պաշտպանելու անհրաժեշտությանը», — հայտարարել է Վիսսինգը։

Բեռլինի տվյալների պաշտպանության և տեղեկատվության ազատության լիազոր Մայկե Կամպը, ով պատասխանատու է Գերմանիայի անունից DPC-ի որոշման աջակցման համար՝ TikTok-ի Բեռլինում գտնվող մասնաճյուղի առկայության պատճառով, հայտարարել է, որ տվյալների բացահայտումը այնպիսի երկրներին, ինչպիսին է Չինաստանը, որոնք չունեն տվյալների պաշտպանության համապատասխան միջոցներ, ներկայացնում է հատկապես լուրջ չարաշահումների ռիսկ և սպառնալիք TikTok-ի օգտատերերի համար։