Հայաստանի վարչապետի աշխատակազմի ղեկավար Արայիկ Հարությունյանը ֆեյսբուքյան իր էջում անդրադարձել է Մերձավան գյուղի միջնակարգ դպրոցում ուսուցչի հետ տեղի ունեցած միջադեպին՝ հորդորելով զերծ մնալ ընդհանրացումներից։
«Մերձավանում տեղի ունեցածի համատեքստում ուզում եմ խնդրել, որ զերծ մնանք ընդհանրացումներից և նույն որակումները չտանք մեր ավելի քան 400 հազար դպրոցականներին:
Նրանց գերակշիռ մեծամասնությունը փայլուն, դաստիարակված, խելացի երեխեք են, որոնք մեծ ապագա են ապահովելու մեր պետությանը: Շատ շփվեք նրանց հետ, ահագին բան կսովորեք»,-գրել է նա։
Կրթության, գիտության, մշակույթի և սպորտի նախարարի տեղակալ Արաքսիա Սվաջյանն, անդրադառնալով Արմավիրի մարզի Փարաքար համայնքի Մերձավան գյուղի միջնակարգ դպրոցում տեղի ունեցած դեպքին, որի ժամանակ պատմության ուսուցչի հանդեպ անպատշաճ վերաբերմունք է դրսևորվել, դպրոցի տնօրենի ժամանակավոր պաշտոնակատարի, մի քանի ուսուցիչների, աշակերտների և ծնողների մասնակցությամբ` փոխնախարարն ասել է, որ անթույլատրելի ու դատապարտելի է որևէ ուսուցչի հանդեպ նման վերաբերմունքը։
