Առողջապահության նախարարությունը հիշեցրել է, որ հողագործական աշխատանքներ կատարելիս շատ կարևոր է հետևել թունաքիմիկատների օգտագործման անվտանգության կանոններին՝ թունավորման ռիսկերը նվազեցնելու համար։
Թունաքիմիկատների ձեռքբերման դեպքում անհրաժեշտ է.
- Ուշադիր կարդալ պիտակի վրա նշված տեղեկությունները՝ օգտագործման եղանակի, թույլատրելի չափաքանակների և անհրաժեշտության դեպքում՝ առաջին օգնության քայլերի վերաբերյալ։
- Խուսափել այնպիսի թունաքիմիկատների ձեռքբերումից, որոնք չունեն պիտակ կամ դրանց տեղեկությունները գրված են անհասկանալի լեզվով։
Օգտագործման ընթացքում կարևոր է.
Օգտագործումից հետո, նախքան ուտելը, ծխելը կամ սանհանգույցից օգտվելը, ձեռքերը և դեմքը լվանալ օճառով։
Թունաքիմիկատների հետ շփման հետևանքով կեղտոտված մաշկը և հագուստը լվանալ առատ ջրով և օճառով։
Անպայման կրել անհատական պաշտպանիչ միջոցներ՝ այդ թվում՝ հատուկ հագուստ, դիմակ, ձեռնոցներ, պաշտպանիչ ակնոց և երկարաճիտ կոշիկներ։
Թունաքիմիկատներով աղտոտված հագուստները լվանալ և պահել առօրյա հագուստից առանձին։
Թունավոր նյութերը չպահել սննդամթերքի տարաներում։
Պահել դրանք գործարանային սրվակներում, իսկ անհրաժեշտության դեպքում՝ ապահովել նախազգուշացնող պիտակներով։
Թունաքիմիկատների խառնուրդները պատրաստել միայն լավ օդափոխվող վայրերում։
Խստիվ արգելվում է փչել սրսկիչ սարքի խցանված ծայրադիրի մեջ։
Քանի որ գրանցվում են երեխաների թունավորման դեպքեր՝ ծնողների անուշադրության պատճառով, նախարարությունը կոչ է արել.
Թունավոր նյութերը պահել բարձր տեղերում, իրենց բնօրինակ փաթեթավորմամբ և փակվող արկղերում։
Չպահել թունաքիմիկատներն այնտեղ, որտեղ երեխաները կարող են մոտենալ։
«Հիշեցվել է՝ ծնողների անտեղյակությունն ու անզգուշությունը կարող են առաջացնել անդառնալի վնասներ»,–ասվում է հաղորդագրության մեջ։
