էկոնոմիկայի նախարար, «Քաղաքացիական պայմանագիր» կուսակցության վարչության փոխնախագահԳևորգ Պապոյանը կառավարության նիստից հետո ճեպազրույցում, անդրադառնալով ԱՄՆ պետքարտուղարի հայտարարությանը, ասել է, որ քանի դեռ խաղաղության պայմանագիրը ստորագրված չէ, բոլոր տեսակի ռիսկերը ինչ-որ չափով առկա են։

Նա նշել է, որ հայկական կողմն ամեն ջանք գործադրում է, որ պայմանագիրը ստորագրվի, հայտնում է 1lurer.am-ը։

«Քանի դեռ խաղաղության պայմանագիրը ստորագրված չէ, բոլոր տեսակի ռիսկերը ինչ-որ չափով առկա են: Մեր ինքնիշխանության և կարմիր գծերի շրջանակում ամեն ջանք գործադրում ենք, որպեսզի կնքենք խաղաղության պայմանագիր, որպեսզի նոր էսկալացիա չլինի, նոր պատերազմ չլինի, նոր զոհեր չունենանք: ՀՀ կառավարությունը այդ ամենն իրականացնում է այդ նպատակով:

Ամերիկյան կողմի հայտարարությունը. ես, իհարկե, դրա մասնագետը չեմ, բայց ցանկացած հայտարարության, որը կօգնի կողմերին ստորագրել արդեն իսկ համաձայնեցված խաղաղության համաձայնագիրը, ես կարծում եմ դրական վերաբերմունք ունեմ, և հակառակը՝ եթե կլինի հայտարարություն, որը կհեռացնի կողմերին կամ կողմերից մեկին այդ հայտարարություններից, բնականաբար, բացասական կգնահատեմ»,- ասել է Պապոյանը։

ԱՄՆ պետքարտուղար Մարկո Ռուբիոն Կոնգրեսի Ներկայացուցիչների պալատի արտաքին հարաբերությունների հանձնաժողովում լսումների ժամանակ ասել էր, որ Վաշինգտոնը կարևորում է ՀՀ և Ադրբեջանի միջև խաղաղության համաձայնագրի կնքման անհրաժեշտությունը։ Նա նշել էր, որ Հայաստանի ու Ադրբեջանի միջև զինված հակամարտության իրական ռիսկը պահպանվում է, և Վաշինգտոնը փորձում է կանխել դա։