Եվրոպայի խորհրդի Տեղական և տարածքային իշխանությունների կոնգրեսի նախագահ Մարկ Քուլսը մայիսի 26-27-ը կժամանի Հայաստան պաշտոնական այցով։ Այդ մասին տեղեկատվություն է հրապարակել Եվրոպայի խորհուրդը, հայտնում է Արմենպրեսը։
Այցի շրջանակում Քուլսը մասնակցություն է ցուցաբերելու «Երևանյան երկխոսություն» համաժողովի բարձր մակարդակի պանելային քննարկումներին, որտեղ հանդես է գալու տեղական և տարածաշրջանային իշխանությունների դերի շուրջ՝ որպես եվրոպական ժողովրդավարական համակարգի հիմնասյուն։ Քուլսը մտադիր է ընդգծել այդ կառույցների առանցքային նշանակությունը Եվրոպայի նոր ժողովրդավարական համաձայնագրի մեջ։
Պաշտոնական այցի շրջանակում նախատեսված են նրա հանդիպումները Հայաստանի Հանրապետության նախագահի, արտաքին գործերի նախարարի, տարածքային կառավարման և ենթակառուցվածքների նախարարի, ինչպես նաև Երևանի քաղաքապետի հետ։
Հանդիպումների ընթացքում կքննարկվեն տեղական ինքնակառավարման նոր օրենքի մշակման գործընթացը, ժողովրդավարական նորարարությունների խթանման, քաղաքացիների ներգրավման և ժողովրդավարության նկատմամբ վստահության վերականգնման ուղիները։
