Ռուսական կողմին պետք չէ համոզել, որ ՀՀ Սյունիքի մարզում գլխավոր հյուպատոսության աշխատանքն արագ սկսելու անհրաժեշտություն կա։ Այսօրվա ճեպազրույցի ժամանակ այս հայտարարությունն է արել ՌԴ ԱԳՆ պաշտոնական ներկայացուցիչ Մարիա Զախարովան։

Նա հիշեցրել է, որ հյուպատոսության բացման հարցը մանրամասն քննարկվել է Ռուսաստանի արտգործնախարար Սերգեյ Լավրովի ՀՀ այցի ընթացքում:

«Պարզ է, որ այս պահին ռուսական հյուպատոսությունը Կապանում բացված չէ։ Ինչո՞ւ՝ այդ հարցով պետք է դիմել հայկական կողմին», — նշել է Զախարովան։

Սյունիքի մարզում ՌԴ գլխավոր հյուպատոսություն բացելու հարցը քննարկվում է շուրջ երեք տարի։ 2023թ. սեպտեմբերից Կապանում աշխատում է հյուպատոսության բացման նախապատրաստական աշխատանքների համար պատասխանատու առաջատար խումբը:

Ավելի վաղ Հայաստանի արտաքին գործերի նախարարությունը հայտնել է, որ Կապանում ռուսական հյուպատոսության բացման հարցը դեռ քննարկման փուլում է։

Ապրիլին Մարիա Զախարովան հայտնել էր, որ Մոսկվան ակնկալում է մինչև մայիս գալ հստակ պայմանավորվածությունների Սյունիքի մարզում հյուպատոսության գործարկման ժամկետների վերաբերյալ։