Արցախի Պաշտպանության բանակի նախկին խոսնակ Սենոր Հասրաթյանը ֆեյսբուքյան իր էջում գրել է, որ գործող իշխանությունը կարող է խուսափել իր գործած մեղքերի հետևանքներից միայն մեկ դեպքում՝ եթե չլինի հայկական պետականություն։

«Այսօրվա հայկական իշխանությունն իր գործած բոլոր մեղքերի համար կարող է պատասխան չտալ միայն ու միայն մեկ պարագայում, եթե չլինի հայկական պետականություն: Բայց պետականությունն, ի հեճուկս մեր (ներքին ու արտաքին) թշնամիների, Հայն արդեն ունի և ունենալու է... Իսկ դա նշանակում է, եթե ոչ այսօր, ապա վաղն, անշուշտ, մ ե ղ ա վ ո ր ը պատասխան է տալու, հիշե՛ք...

Հ.գ.-Նավի խորտակման պահին նավից ցատկողը շիկամուկ (առնետ) է... Նրան կարելի է հասկանալ, որովհետև ուզում է ապրել...»։

Ադրբեջանը 2023–ի սեպտեմբերի 19-ին Արցախի դեմ լայնամասշտաբ հարձակում է իրականացրել՝ ամբողջությամբ զանգվածային հրետակոծության տակ առնելով երկիրը։ Արդյունքում մեկ օր անց՝ սեպտեմբերի 20-ին ԱՀ իշխանություններն ընդունել են ռուսական խաղաղապահ առաքելության հրամանատարության առաջարկը կրակի դադարեցման վերաբերյալ՝ համաձայնվելով Բաքվի պայմաններին՝ ՊԲ զինաթափում և Արցախի Հանրապետության լուծարում։ Սեպտեմբերի 24-ից արցախցիների բռնի տեղահանում է սկսվել, 100,000–ից ավելի մարդ է բռնի տեղահանվել Հայաստան: Ըստ որոշ տվյալների, Արցախում մոտ 20 հայ է մնացել։ Սեպտեմբերի 28–ին ԱՀ նախագահ Սամվել Շահրամանյանը հրամանագիր է ստորագրել ԱՀ լուծարման մասին, որը ուժի մեջ է մտել 2024–ի հունվարի 1–ից։