Հայաստանի ֆուտբոլի ազգային թիմի կիսապաշտպան Վահան Բիչախչյանն ավարտված մրցաշրջանից դժգոհ չէ, սակայն նպատակի ունի առավել շատ խաղաժամանակ ստանալ գալիք մրցաշրջանում:
Նա համոզված է, որ հաջորդ մրցաշրջանն ավելի լավը կլինի, հայտնում է Արմենպրեսը։
«Ինձ համար այս մրցաշրջանը երկու տարբեր հատվածներ ունեցավ, քանի որ առաջին հատվածում հանդես էի գալիս «Պոգոն»-ի, իսկ երկրորդը` «Լեգիա»-ի կազմում: «Լեգիա»-ի տեղափոխությունից հետո վնասվածքս խորացավ ու խանգարեց ինձ: Ուրախ եմ, որ «Լեգիա»-ի կազմում դարձա Լեհաստանի գավաթակիր»,- ասել է նա։
Վերջինիս խոսքով` մրցաշրջանի վերջնամասում նոր ակումբում ավելի քիչ խաղաժամանակ է ստացել ու հիմա իր հիմնական նպատակը հաջորդ մրցաշրջանում հնարավորինս շատ խաղալն է:
«Հաջորդ մրցաշրջանը, միանշանակ, ավելի լավը կլինի: Հիմա երեք շաբաթ է, ինչ սկսել եմ բուժումներս վնասվածքից: Թիմի հետ մարզումային աշխատանքներս կսկսեմ երեք շաբաթից»,-առանձնացրեց նա:
Վահան Բիչախչյանը «Լեգիա»-ի հետ դարձել է Լեհաստանի գավաթի խաղարկության հաղթող:
