«Լուսավոր Հայաստան» կուսակցության նախագահ, հատուկ հանձնարարություններով նախկին դեսպան Էդմոն Մարուքյանը Տելեգրամի իր ալիքում գրել է, որ ընդգծել է, որ ներկայումս Հայաստանի առաջ ծառացած լրջագույն խնդիրներ և մարտահրավերներ կան այսօր, բայց մենք «կրկին զբաղված ենք անհեթեթություններով»։

Նա հիշեցրել է, որ 2019 և 2020 թվականներին քաղաքական, հասարակական, գիտական, մեդիա, ակտիվիստական ու նույնիսկ ռազմական շրջանակների մտավոր ներուժը կենտրոնացած է եղել միայն մեկ՝ իշխանությունների կողմից ստեղծված և առաջ մղված թեմայի վրա, որն ամբողջությամբ հեղեղել է հանրային դաշտը՝ խոչընդոտելով այլ կենսական հարցերի քննարկումը։ Այդ թեման Սահմանադրական դատարանի ճգնաժամն է եղել։

«Եթե կարճ՝ դա մի անհեթեթություն էր, որի միջով մենք բոլորս անցանք։

Այս օրերին Հայաստանի Հանրապետության հասարակական ամբողջ միտքը կենտրոնացած է Հայ Առաքելական Սուրբ Եկեղեցու, սրբազանների սեռական կյանքի ու անկողինների, կուսակրոնության և եկեղեցու ներքին խնդիրների վրա։ Բոլորի միտքը դրանով է զբաղված՝ թիվ մեկ մարդուց մինչև վերջինը։

Ցանկանում եմ հիշեցնել, որ 2019–20 թվականներին մտավոր ռեսուրսը սխալ ուղղությամբ աշխատացնելու և կիրառելու արդյունքում մեր պետությունը պատերազմի հանգեց։ Կործանարար պատերազմի, որի ալիքներից մինչ օրս ջախջախիչ հարվածներ է ընդունում։

Մեր առջև ծառացած լրջագույն խնդիրներ և մարտահրավերներ կան այսօր, բայց մենք կրկին զբաղված ենք անհեթեթություններով։ Անհրաժեշտ է սթափվել և որքան հնարավոր է շուտ կանգնեցնել այն գործընթացը, որը պայթյունից առաջ սկսվող հետհաշվարկ է հիշեցնում»,–գրել է նա։

Վարչապետ Նիկոլ Փաշինյանը, արձագանքելով հոգևորականների քննադատությանը, որը հաջորդել է կառավարության նիստում եկեղեցիները «չուլանի» նմանեցնելու նրա խոսքերին, վիրավորական արտահայտություններ է թույլ տվել եկեղեցականների հասցեին։ Նա այդպիսի բովանդակությամբ ֆեյսբուքյան մի քանի գրառում է արել իր էջում, որին իր գրառումներով միացել է նաև կինը՝ Աննա Հակոբյանը․ «Սրբազան, գնա շարունակիր քեռուդ կնգան դոմփել»-ից, մինչև՝ «երկրի գլխավոր մանկապիղծներ»։ Փաշինյանը հայտարարել է, որ պետությունը պետք է առանցքային դեր ունենա Ամենայն Հայոց կաթողիկոսի ընտրության գործընթացում։ Մեկ այլ գրառմամբ Փաշինյանը կասկածի տակ է դրել Ամենայն Հայոց կաթողիկոս Գարեգին Բ-ի կուսակրոնության կարգի պահպանումը։