Երևանի նախկին քաղաքապետ Հայկ Մարությանը ֆեյսբուքյան իր էջում , անդրադառնալով քաղաքապետարանի այն հայտարարությանը, թե ուղավարձի թերհավաքագրման պատճառով չեն կարողանալու նոր տրոլեյբուսներ գնել, նշել է, որ տրանսպորտային ռեֆորմի ձախողման պատասխանատվությունը փորձում են դնել «անբարեխիղճ ուղևորների» վրա։

Նա հարց է ուղղել քաղաքապետ Տիգրան Ավինյանին՝ «հարկերը բարձրացնելու հաշվին էդքան փող եք հավաքում, ինչի՞ վրա եք ծախսում, որ տրանսպորտի համար փողը չի հերիքում»։

«Քանի դեռ Նիկոլ Փաշինյանն ու «ավանդական ընդդիմությունը» միմյանց անկողին են մտել, երկրում բազում խնդիրներ կան, որոնք անմիջականորեն վերաբերում են մարդկանց կյանքի պայմաններին։

Դրանցից մեկի՝ Երևանի հանրային տրանսպորտի խնդրի մասին այսօր քաղաքապետարանը մի քանի ուշագրավ հայտարարություն է արել (տեսանյութը՝ մեկնաբանություններում)։

Եթե երկու բառով ամփոփենք՝ քաղաքապետարանը տեղեկացրել է, որ ի վիճակի չէ տրանսպորտի նոր շարժակազմ ձեռք բերել, որովհետև չի կարողանում տոմսերի վաճառքից բավարար չափով գումար հավաքել։ Այլ կերպ ասած՝ տրանսպորտային ռեֆորմի ձախողման պատասխանատվությունը փորձում են դնել «անբարեխիղճ ուղևորների» և բոյկոտը կազմակերպող «չար ընդդիմադիրների» վրա։

Սրա հետ կապված մի քանի նկատառում ունեմ․

• Նախ՝ ուղեվարձի թանկացման դեմ պայքարը նախաձեռնելիս մենք ասում էինք, որ մանրամասն հաշվարկ է պետք, որպեսզի հասկանալի լինի և մարդկանց գնողունակությունը, և տրանսպորտի զարգացման վրա թանկացումների հնարավոր ազդեցությունները։ Այսօրվա վիճակը ապացուցում է, որ մենք ճիշտ էինք՝ քաղաքապետարանը թանկացումը հիմնավորող նորմալ հաշվարկ չունի։
• Ավինյանի հետ բանավեճի ժամանակ հարցրեցի ու այդպես էլ պատասխանը չստացա, հիմա նորից եմ հարցնում՝ հարկերը բարձրացնելու հաշվին էդքան փող եք հավաքում, ինչի՞ վրա եք ծախսում, որ տրանսպորտի համար փողը չի հերիքում։ Սրա հետ կապված ուզում եմ հիշեցնել, որ իմ քաղաքապետության շրջանում ձեռք ենք բերել այսօրվա ավտոպարկի մեծ մասը՝ մոտ 460 ավտոբուս, բացառապես Երևանի բյուջեի հաշվին։ Շեշտում եմ՝ կառավարությունից ոչ մի լումա դոտացիա չենք ստացել և ուղետոմսերը չենք թանկացրել։
• Բա ասում էիք «բոյկոտը ձախողվել ա», հիմա ինչո՞ւ եք դժգոհում թերհավաքագրումներից։ Քաղաքապետարանի այսօրվա հայտարարությունը ապացուցեց, որ մեր նախաձեռնած բոյկոտը հաջողվել է, ինչի կապակցությամբ շնորհավորում եմ բոլորիս։
• Ասում էիք՝ «թանկացնում ենք, որ նոր շարժակազմ բերենք»։ Քանի որ չեք բերում նոր շարժակազմ, դե հիմա էժանացրեք։
• Հերթական անգամ իրենց ձախողումների համար մեղադրում են բոլորին՝ ընդդիմությանը, բոյկոտող ժողովրդին, վատ եղանակին, Նուպագաձիին։ Իրականում, մեղավորը ոչ կոմպետետ, կարճամիտ ու կոռումպացված իշխանավորներն են։ Հենց նրանք չլինեն, ամեն ինչ կամաց-կամաց տեղը կընկնի մեր բոլորիս միասնական ջանքերով»,–ասվում է գրառման մեջ։

Երևանի քաղաքապետի մամուլի խոսնակ Հայկ Կոստանյանը հունիսի 3–ին հայտարարել է, որ Երևանում տրանսպորտի ուղեվարձի դեմ ակցիաների արդյունքում թերհավաքագրումներ են եղել, ինչի հետևանքով հնարավոր չէ գնել նախատեսված շարժակազմի մեծ մասը։

«Այս տարի քաղաքապետարանը նախատեսել և հայտարարել էր, որ ձեռք է բերելու 45 տրոլեյբուս, պարզվում է՝ դրանցից 30-ը հնարավոր չի լինի գնել, քանի որ թերհավաքագրումների պատճառով գումար չկա։ Եթե նման տեմպերով շարունակվեն հավաքագրումները, չի բացառվում, որ 15 տրոլեյբուս էլ Երևանի քաղաքապետարանը չի կարող ձեռք բերի»,-ասել է նա։