Կոտայքի մարզի Հանքավան գյուղում մեկնարկել է «Ռոսսոտրուդնիչեստվոյի» հայաստանյան ներկայացուցչության կազմակերպած լեզվի ամառային դպրոցի առաջին հերթափոխը:
Հայաստանում Ռուսական տունը տեղեկացրել է, որ այս տարվա ծրագիրը նոր որակական աստիճան է ստացել։ Թիմին միացել է բանասիրական գիտությունների թեկնածու, Ռուսաստանի ժողովուրդների բարեկամության համալսարանի ընդհանուր և ռուսաց լեզվաբանության ամբիոնի դոցենտ Պոլինա Պովալկոն։ Նրա հետ դասերը վարում է «ЗаРусский» շարժման կամավոր Նադեժդա Գրիգորյանցը, հայտնում է Sputnik Արմենիան։
«Մեզ համար կարևոր է, որ երեխաները ռուսաց լեզվի ուսուցումը կապեն ուրախության, բացահայտման, բարեկամության հետ։ Հենց այդպիսի մթնոլորտ ենք ստեղծում Հանքավանում»,-նշել է Ռոսսոտրուդնիչեստվոյի գլխավոր մասնագետ-փորձագետ Այգուլ Շամսուտդինովան։
Դասընթացները ներառել են խաղային վարժանքներ, ստեղծագործական աշխատանքներ և փոքր բեմադրություններ։
