ՀՀ աշխատանքի և սոցիալական հարցերի նախարար Նարեկ Մկրտչյանն ու Իտալիայի Հանրապետության հաշմանդամություն ունեցող անձանց հարցերի նախարար Ալեսանդրա Լոկատելլին Երևանում կնքել են համագործակցության հուշագիր, որի նպատակն է խթանել փորձի փոխանակումն ու համատեղ նախաձեռնությունները՝ ուղղված հաշմանդամություն ունեցող անձանց իրավունքների պաշտպանությանը և սոցիալական ներառման ապահովմանը։

Փաստաթղթով առանձնացված է սոցիալական պաշտպանության ոլորտի քաղաքականությունների մշակման կատարելագործման, ինչպես նաև միջազգային փոխգործակցության և փորձի փոխանակման կարևորությունը։ Երկու կողմերն ընդգծել են իրենց հավատարմությունը՝ «Հաշմանդամություն ունեցող անձանց իրավունքների մասին» կոնվենցիայում ամրագրված սկզբունքներին։

Ըստ հուշագրի, համագործակցությունն ընդգրկում է մի շարք ոլորտներ, ներառյալ՝

• հաշմանդամություն ունեցող անձանց իրավունքների պաշտպանությունն ու մատուցվող ծառայությունները,
• օրենսդրական փոփոխությունների իրականացումը,
• ներառական աշխատաշուկայի խթանումը,
• անկախ կյանքի հնարավորությունների ընդլայնումն ու սոցիալական երաշխիքների մեխանիզմների կատարելագործումը։

Գործակցությունը կիրականացվի հետևյալ ձևաչափերով՝

• համատեղ նախաձեռնությունների և ծրագրերի մշակում,
• փորձի փոխանակման նպատակով ծրագրերի իրականացում,
• տարբեր հանդիպումների, համաժողովների, հետազոտությունների և ոլորտային քննարկումների կազմակերպում։

Երկու նախարարներն էլ փաստաթղթի ստորագրումը գնահատել են որպես էական առաջընթաց՝ ուղղված հաշմանդամություն ունեցող անձանց սոցիալական ներգրավվածության և հավասար հնարավորությունների երաշխավորմանը։