Երևանի քաղաքապետ Տիգրան Ավինյանը Երևանի ավագանու նիստում հայտարարել է, որ քննարկման հիմնական առարկան 45 օտարված մանկապարտեզներն են, և ըստ նրա՝ «Մայր Հայաստան» խմբակցությունը դիտավորյալ փորձում է շեղել ուշադրությունը։

«Խոսում ենք 45 օտարված մանկապարտեզների մասին, և «Մայր Հայաստան» խմբակցությունը նպատակադրված ամեն ինչ անում է, որ թեման շեղի։ Մենք դա ձեզ թույլ չենք տալու»,–ասել է Ավինյանը, հայտնում է Radar.am-ը։

«Մայր Հայաստան» խմբակցության անդամ Արմենակ Դանիելյանը հարց էր ուղղել, որն առնչվում էր մանկապարտեզներում առկա հերթերին։ Ավագանու անդամը պնդել է, որ հարցին պատասխանի քաղաքապետ Տիգրան Ավինյանը։

Քաղաքապետը հորդորեց կարդալ կանոնակարգը.«Կանոնակարգը բացեք և կարդացեք, որ անընդհատ նույն հարցերին նույն շրջապտույտը չանենք։ Հարցերն ուղղվում են զեկուցողին, լինում են զեկուցվող հարցի վերաբերյալ»,- նշել է Ավինյանը։

Զեկուցվող հարց վերաբերում էր 1991–ի սեպտեմբերի 21–ից մինչև 2025 թվականը Երևանի նախկին թաղային համայնքներին և Երևան համայնքին պատկանած դպրոցների և մանկապարտեզների տարածքների օտարման գործընթացներն ուսումնասիրող Երևանի ավագանու քննող հանձնաժողով ստեղծելուն։

Հանձնաժողովը կունենա 12 անդամ, յուրաքանչյուր խմբակցությունից 3 անդամ։ Այն կգլխավորի ՔՊ խմբակցության ղեկավար Արմեն Գալջյանը։