ՀՀ արտաքին գործերի նախարար Արարատ Միրզոյանը Երևանում գտնվող Եվրամիության արտաքին հարաբերությունների նորանշանակ ղեկավար Կայա Կալասի հետ հանդիպումից հետո հայտարարել է, որ Հայաստանը և ԵՄ-ն խորհրդակցություններ են սկսել պաշտպանության և անվտանգության ոլորտում։

«Սա վճռորոշ քայլ է երկկողմ համագործակցության շրջանակը ժամանակակից մարտահրավերներին հարմարեցնելու և դրանց հաղթահարման լրացուցիչ ջանքեր գործածելու առումով»,–ասել է Միրզոյանը, հայտնում է Sputnik Արմենիան։

Բանակցությունների ընթացքում, ի թիվս այլ հարցերի, քննարկվել են նաև ԵՄ դիտորդական առաքելության աշխատանքը Հայաստանում, ինչպես նաև Հայաստանին ցուցաբերվող օժանդակությունը «Եվրոպական խաղաղության հիմնադրամի» շրջանակում։

Միրզոյանը հայտարարել է նաև, որ Հայաստանը և ԵՄ–ն հաջողությամբ ավարտել են գործընկերության նոր օրակարգի շուրջ բանակցությունները, հայտնում է 1lurer.am-ը։

«Սա հավակնոտ փաստաթուղթ է, որը համագործակցության նոր ուղղություններով է համալրելու և առավել խորացելու ՀՀ-ԵՄ երկկողմ օրակարգը՝ միաժամանակ խթանելով Հայաստանի և ԵՄ-ի միջև համապարփակ ու ընդլայնված գործընկերության պայմանագրի արդյունավետ կիրարկումը»,–ասել է նա։

Միրզոյանն ընդգծել է Հայաստանի դիմակայունության ամրապնդմանն ուղղված նախաձեռնությունները՝ ներառյալ ժողովրդավարական ինստիտուտների զարգացումը, հիբրիդային սպառնալիքներին և ապատեղեկատվությանը հակազդելու միջոցառումները։

«ՀՀ-ի և ԵՄ-ի միջև Եվրոպական միության ճգնաժամի կառավարման գործողություններում ՀՀ-ի մասնակցության շրջանակը սահմանելու մասին համաձայնագրի ստորագրումը ՀՀ-ԵՄ գործընկերության օրակարգի ընդլայնման երկուստեք արտահայտված պատրաստակամության վառ օրինակն է, որը միևնույն ժամանակ ի ցույց է դնում գլոբալ անվտանգության, աշխարհում կայունության և խաղաղության հաստատման գործում կառուցողական ներդրում ունենալու՝ Հայաստանի ձգտումը և ցանկությունը»,–հայտարարել է Միրզոյանը։

Ավարտելով իր խոսքը՝ Միրզոյանը նշել է. «Այսպիսով, այսօր մենք վստահությամբ արձանագրում ենք, որ ՀՀ-ԵՄ հարաբերությունները երբեք այսքան ընդգրկուն և սերտ չեն եղել»։

Նա նաև շնորհակալություն է հայտնել ԵՄ-ին՝ վերջին տարիների ընթացքում Հայաստանի կողքին լինելու և աջակցություն ցուցաբերելու համար։

2024 թվականի հուլիսին ԵՄ-ն արդեն հատկացրել է 10 միլիոն եվրո այդ հիմնադրամից՝ ուղղված ՀՀ զինված ուժերի նյութատեխնիկական կարողությունների կատարելագործմանը։ Այս տարվա ընթացքում նախատեսվել է տրամադրել ևս 20 միլիոն եվրո, սակայն Հունգարիան արգելափակել է այդ փոխանցումը՝ առաջ քաշելով պահանջ, որ նման ֆինանսավորում տրամադրվի նաև Ադրբեջանին։ Այս հարցի շուրջ քննարկումները դեռ շարունակվում են։