Ազգային ժողովի արտահերթ նստաշրջանի օրակարգում է «Ավտոմոբիլային տրանսպորտի մասին» օրենքում փոփոխություններ և լրացումներ կատարելու մասին և կից ներկայացված օրենքների նախագծերի փաթեթը, որով նախատեսվում է սահմանել վարչական պատասխանատվություն ուղեվարձը չվճարելու համար։

Ըստ նախագծի՝ տրանսպորտում չվճարող և նույնականանալ չցանկացող անձը կարող է վարչական ձերբակալության ենթարկվել, հայտնում է 1lurer.am-ը։

«Հայաստան» խմբակցության պատգամավոր Արման Ղազարյանը, անդրադառնալով թեմային, նշել է, որ եթե քաղաքացին հրաժարվել է փաստաթղթեր ներկայացնելուց, ապա հսկիչը ստիպված է իրականացնել զննում կամ խուզարկություն՝ հավելելով, որ նման գործողությունների իրականացումը հարցեր է առաջացնում:

«Պատկերացնո՞ւմ եք՝ հսկիչը փողոցում չվճարած քաղաքացու հետևից ընկնի և փորձի գրպանները ստուգել, թե ինչ կա կամ չկա գրպանում»,- ասել է պատգամավորը՝ շեշտելով գործընթացի խստացման հանգամանքը։

Նա նաև հիշեցրել է, որ խնդիրը քննարկվել է հանձնաժողովի նիստում, և հնչել են որոշ դրույթներ վերանայելու առաջարկներ:

«Եթե քաղաքացին տեխնիկական կամ չգիտեմ ինչ պատճառներով չկարողանա վճարել, պետք է ձեր հսկիչն ընկնի այդ քաղաքացու հետևից քաղաքով մեկ, բռնի, որպեսզի խուզարկի կամ ջեբերը մտնի, որ տեսնի՝ այդ մարդու մոտ կա՞ անձնագիր, թե՞ չէ»,-ասել է նա։

Տարածքային կառավարման և ենթակառուցվածքների նախարարի տեղակալ Արմեն Սիմոնյանը պարզաբանել է, որ վարչական վարույթի շրջանակում որոշակի առանձնահատկություններ են նախատեսված։ Քաղաքացին, որը հրաժարվում է վճարել կամ նույնականանալ, կարող է ենթարկվել վարչական ձերբակալության՝ օրենքով սահմանված կարգով, և կկրի վարչական պատասխանատվություն՝ համապատասխան ընթացակարգերի կիրառմամբ։

«Ցանկացած գործողություն, որ պետք է իրականացվի համապատասխան մարմինների կողմից, կարող է բողոքարկվել վարչական վարույթի շրջանակում, իսկ դրանից հետո՝ դատական կարգով»,- ասել է Սիմոնյանը։

Oրինագծով առաջարկվում է տուգանել այն անձանց, ովքեր օգտվում են տրանսպորտային ծառայություններից՝ չկատարելով համապատասխան վճարումը։

«Քաղաքացիական պայմանագիր» խմբակցության պատգամավոր Ռուբեն Ռուբինյանը հայտարարել է, որ իրականությանը չի համապատասխանում այն պնդումը, թե տրանսպորտում հսկիչին տրվում է զննություն իրականացնելու իրավասություն։

«Հսկիչն ընդհանրապես զննություն չի անելու»,–ասել է նա, հայտնում է Radar.am-ը։

Նա նշել է, որ օրենքի նախագծով սահմանվում է՝ եթե ուղևորը հրաժարվում է վճարումից և նույնականացումից, ապա հսկիչը դիմում է ոստիկանությանը։

«Ըստ նախագծի՝ եթե մարդը չի վճարել ու հրաժարվում է նույնականացվել, հսկիչը դիմում է ոստիկանին, որն, այսպես, թե այնպես, իրավունք ունի մարդուն նույնականացնել»,- ասել է Ռուբինյանը՝ հերքելով ընդդիմադիր պատգամավորների պնդումները։

Պատգամավորը նաև պարզաբանել է, որ խորհրդարանում քննարկման առարկան ուղեվարձի չափը չէ, այլ՝ երբ ուղևորը չի կատարում վճարում, դրան հաջորդող պատասխանատվության մեխանիզմը։

Վարչական իրավախախտումների վերաբերյալ օրենսգրքում առաջարկվող փոփոխությամբ սահմանվում է նաև, որ հասարակական տրանսպորտից վճարում չկատարած կամ կրիչը չվավերացրած քաղաքացին ենթարկվելու է 15 հազար դրամի չափով տուգանքի։

«Եթե քաղաքացին օգտվել է ոչ իր կողմից ձեռք բերված կամ արտոնություն ունեցող անձի կրիչը կրող քարտից կամ արտոնությունից ընդհանրապես, ապա այս պարագայում սահմանվում է 15-ապատիկի չափով, այսինքն՝ 15 հազար դրամ, և 3-ապատիկի չափով է սահմանվում, եթե ունի նման հնարավորություն, արտոնություն, սակայն չի վավերացրել կրիչը տրանսպորտային միջոցում, այսինքն՝ տրանսպորտային միջոց բարձրանալիս ձեռք է բերել համապատասխան իրավունք, սակայն այդ իրավունքը չի վավերացրել»,- ասել է Սիմոնյանը, հայտնում է 1lurer.am-ը։

Սիմոնյանը հավելել է նաև, որ եթե խնդիրն առաջացել է տեխնիկական պատճառներով, և տրանսպորտային ծառայությունը մատուցող կազմակերպությունն ինքն է անընդունակ եղել վավերացնել քաղաքացու կրիչը, ապա տվյալ պարագայում վարչական պատասխանատվություն չի կիրառվելու։

ԱԺ-ում այս օրերին քննարկվում է օրենսդրական նախագիծ, որով առաջարկվում է վարչական պատասխանատվություն կիրառել այն քաղաքացիների նկատմամբ, ովքեր օգտվում են հասարակական տրանսպորտից՝ չկատարելով վճարում։