Մարդու իրավունքների պաշտպան Անահիտ Մանասյանը խստորեն դատապարտել է հուլիսի 8-ին Ազգային ժողովում պատգամավորների մասնակցությամբ տեղի ունեցած միջադեպը:

Նա նշել է, որ խորհրդարանը պետք է լինի կառուցողական երկխոսության հարթակ:

«Խորհրդարանը պետք է ժողովրդավարական քննարկումների հարթակ լինի, այլ ոչ «մարտադաշտ»:

Պատգամավորական էթիկայի հարցերը քննող պատշաճ մեխանիզմների ձևավորումն օրակարգային անհրաժեշտություն է»,–հայտարարել է նա։

ԱԺ-ում «Հայաստան» խմբակցության պատգամավոր Արթուր Սարգսյանին պատգամավորական անձեռնմխելիությունից զրկելու և կալանավորելու հարցի քննարկման ժամանակ, պատգամավորի ելույթից հետո, ԱԺ-ում կրքերը թեժացել են, դահլիճ են մտել անվտանգության աշխատակիցները։ ԱԺ-ում լարված իրավիճակը փոքր ինչ հանդարտվելուց հետո ՊՊԾ-ն եկել է տանելու «Հայաստան» խմբակցության պատգամավոր Լևոն Քոչարյանի օգնականին՝ Արթուր Սուքոյանին։Ազգային ժողովի փոխնախագահ Հակոբ Արշակյանն, անդրադառնալով միջադեպին, ասել է, որ ընդդիմության նպատակը իրավիճակը սրելն է և հանդարտության կոչ է արել։