Աբու Դաբիում մեկնարկել է Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի հանդիպումը։ Այդ մասին հայտնել է ՀՀ վարչապետի մամուլի քարտուղար Նազելի Բաղդասարյանը։

«Աբու Դաբիում, Հայաստանի և Ադրբեջանի միջև խաղաղության գործընթացի շրջանակում, մեկնարկել է Հայաստանի Հանրապետության վարչապետ Նիկոլ Փաշինյանի և Ադրբեջանի Հանրապետության նախագահ Իլհամ Ալիևի երկկողմ հանդիպումը»,–ասվում է գրառման մեջ։

Հանդիպմանը հայկական կողմից մասնակցում են ՀՀ արտաքին գործերի նախարար Արարատ Միրզոյանը, Անվտանգության խորհրդի քարտուղար Արմեն Գրիգորյանը, փոխվարչապետ, Հայաստանի և Ադրբեջանի սահմանազատման հանձնաժողովի ղեկավար Մհեր Գրիգորյանը, ինչպես նաև ԱԺ փոխնախագահ, Հայաստան-Թուրքիա կարգավորման հարցերով Հայաստանի հատուկ ներկայացուցիչ Ռուբեն Ռուբինյանը։

Ադրբեջանի պատվիրակությունը ներկայացնում են Ադրբեջանի արտաքին գործերի նախարար Ջեյհուն Բայրամովը, փոխվարչապետ ու սահմանազատման հանձնաժողովի ղեկավար Շահին Մուստաֆաևը, նախագահի խորհրդական Հիքմեթ Հաջիևը և հատուկ հանձնարարություններով ներկայացուցիչ Էլչին Ամիրբեկովը։

Փաշինյանն Աբու Դաբի է ժամանել հուլիսի 9-ին։ Այդ օրը նա հանդիպել է Արաբական Միացյալ Էմիրությունների նախագահ շեյխ Մուհամմադ բին Զայեդ Ալ Նահյանի հետ։

Փաշինյանը և Ալիևը վերջին անգամ հանդիպել են մայիսի 16–ին Տիրանայում՝ Եվրոպական քաղաքական համայնքի գագաթնաժողովի շրջանակում։