Հոկտեմբերի 22-ին Արագածոտնի թեմի առաջնորդ Գերաշնորհ Տեր Մկրտիչ եպիսկոպոս Պռոշյանի օրհնությամբ և Հոգեշնորհ Տեր Շնորհք աբեղա Պալոյանի նախագահությամբ կայացել է թեմի հոգևորականների ժողովը, հայտնում է Արագածոտնի թեմը։

«Ժողովականներին ներկայացվել է Ամենայն Հայոց կաթողիկոսի հայրապետական տնօրինությունը՝ Արագածոտնի թեմի Վարչական խորհուրդ հաստատելու վերաբերյալ՝ հետևյալ կազմով․

• Հոգեշնորհ Տ․Շնորհք աբեղա Պալոյան (ատենապետ),
• Արժանապատիվ Տ. Եղիշե քահանա Բարսեղյան (անդամ),
• Արժանապատիվ Տ․Մուշե քահանա Վահանյան (անդամ)։

Թեմակալ առաջնորդի ապօրինի կալանավորման և հարկադիր բացակայության պայմաններում Վարչական խորհուրդը կոչված է տնօրինելու թեմի ընթացիկ գործերը»,–ասվում է հաղորդագրության մեջ։

Ժողովի ընթացքում քննարկման առարկա են դարձել կազմակերպչական բնույթի, ծիսակատարական և հովվական բնագավառի մի շարք հարցեր։ Քահանայական դասը անդրադարձ է կատարել նաև Եկեղեցու ներկայիս վիճակին ու դրանում առկա մտահոգիչ զարգացումներին։

Քննարկումներից հետո ժողովը որոշում է կայացրել․

• Ամեն կիրակի՝ Սուրբ Պատարագի ավարտին կատարել հատուկ աղոթքի կարգ՝ նվիրված անազատության մեջ գտնվող առաջնորդ Մկրտիչ Սրբազանի, ինչպես նաև Միքայել և Բագրատ Սրբազանների և նվիրյալ որդիների համար։
• Ամեն շաբաթ թեմի սրբավայրերից մեկում իրականացնել միասնական ժամերգություն, որի վերաբերյալ նախապես կտրամադրվի տեղեկատվություն։

Հոկտեմբերի 15–ին վաղ առավոտից Քննչական կոմիտեն ԱԱԾ-ի ուղեկցությամբ խուզարկություններ է իրականացրել Արագածոտնի թեմի առաջնորդարանում և մի շարք հոգևորականների տներում, որից հետո թեմի տասնյակ հոգևորականներ, այդ թվում թեմի առաջնորդ Մկրտիչ եպիսկոպոս Պռոշյանը, թեմի աշխարհիկ աշխատակիցներ, տարվել էին Քննչական կոմիտե։ Դատարանի որոշումներով,Մկրտիչ եպիսկոպոս Պռոշյանը կալանավորվել է երկու ամսով, իսկ Մուղնիի Սուրբ Գևորգ եկեղեցու հոգևոր հովիվ, Արագածոտնի թեմի դիվանապետ Տեր Գարեգին Արսենյանը՝ մեկ ամսով։ Մյուսներն ունենվկայի կարգավիճակ։

Քննչական կոմիտեն հաղորդել է, որ թեմի առաջնորդի նկատմամբ հարուցվել է հանրային քրեական հետապնդում՝ ՀՀ Քրեական օրենսգրքի երկու հոդվածներով՝ ընտրական իրավունքի իրացմանը խոչընդոտելու նպատակով պաշտոնեական դիրքի օգտագործում, ինչպես նաև՝ իշխանական կամ ծառայողական լիազորությունների կիրառմամբ հավաքներին մասնակցելուն հարկադրելու մեղադրանքներով։