Իրանի արտաքին գործերի նախարար Աբբաս Արաղչին հանդիպում է անցկացրել Հայաստանում նորանշանակ դեսպան Խալիլ Շիրղոլամիի հետ՝ մինչ վերջինիս մեկնելը Երևան։
Նախարարն ընդգծել է Իրանի և Հայաստանի միջև տարբեր ոլորտներում համագործակցությունն ամրապնդելու համար բոլոր հնարավորությունների օգտագործման անհրաժեշտությունը, հայտնում է Արմենպրեսը՝ IRNA գործակալության վրա հղումով։
Դեսպան Շիրղոլամին ներկայացրել է իր նախաձեռնությունները՝ ուղղված բարիդրացիական հիմքի վրա երկու հարևան պետությունների միջև փոխհարաբերությունների զարգացմանը։
Իր մաղթանքներում Արաղչին շեշտել է, որ Իրանի և Հայաստանի հարաբերությունները կառուցված են քաղաքակրթական և պատմական հիմքերի վրա։
Նախքան դեսպան նշանակվելը Խալիլ Շիրղոլամին զբաղեցրել է Իրանի ԱԳՆ Քաղաքական և միջազգային հետազոտությունների կենտրոնի ղեկավարի տեղակալի պաշտոնը՝ պատասխանատու լինելով հետազոտական և վերլուծական աշխատանքների համար։
