Ամենայն Հայոց կաթողիկոս Գարեգին Երկրորդը քվեարկել է Էջմիածնի 14/11 ընտրատեղամասում՝ Հայաստանի բարօրության և անվտանգության համար։ Այդ մասին նա հայտնել է լրագրողների հետ զրույցում։

«Մենք կատարեցինք մեր ընտրությունն աղոթքով և Աստծով, որ Աստված անսասան պահի հայոց պետությունը, օրհնի մեր ժողովրդին` հաղթահարելու մեր կյանքում առկա այս դժվարին փորձությունները, և կերտելու հզոր, ապահով անվտանգ և բարօր երկիր»,– ասել է կաթողիկոսը, հայտնում է Sputnik Արմենիան:

Հայրապետին ընտրատեղամաս են ուղեկցել Մայր Աթոռի դիվանապետ Արշակ սրբազանը, Գուգարաց թեմի առաջնորդ Հովնան եպիսկոպոս Հակոբյանը, Արթիկի թեմի առաջնորդ տեր Նարեկ եպիսկոպոս Ավագյանը և այլ հոգևորականներ։

Հայաստանում անցկացվում են խորհրդարանական ընտրություններ, որոնց մասնակցում է 18 քաղաքական ուժեր՝ 16 կուսակցություն և 2 դաշինք։ Ընտրելու իրավունք ունի 2 միլիոն 485 հազար 851 քաղաքացի։