Հայաստանի զինված ուժերի գլխավոր շտաբի պետ Էդվարդ Ասրյանը հերքել է այն պնդումները, թե վարժական հավաքներն օգտագործվում են որպես ճնշման կամ պատժիչ գործիք ընդդիմադիր քաղաքական գործիչների և նրանց համակիրների նկատմամբ։
Նա հավելել է, որ բանակը երբեք պատժիչ միջոց չի եղել, հայտնում է Արմենպրեսը:
«Պետք է հպարտանաք ՀՀ բանակով, որտեղ մեր բոլորի զավակներն են։ Բանակի վարժական հավաքներին պետք է ընդգրկվի ՀՀ քաղաքացի հանդիսացող մարդը, պահեստազորայինը, ով մտնում է համապատասխան տարիքային շեմի մեջ, հաշվառված է ՀՀ տարածքում՝ Երևանի կամ մարզերի այս կամ այն զինկոմիսարիատներում։ Նրանք պետք է հերթականությամբ կանչվեն վարժական հավաքների»,-ասել է Ասրյանը:
Նա հավելել է, որ վարժական հավաքներն անցկացվում են 2023 թվականից սկսած՝ ընդգրկելով ՀՀ տասնյակ հազարավոր քաղաքացիների, որոնք կատարել են իրենց պարտքը հայրենիքի հանդեպ։
ԶՈւ գլխավոր շտաբի պետն անդրադարձել է նաև հատկապես Ռուսաստանից հունիսի 7-ի ընտրությունների համար Հայաստան ժամանած ՀՀ քաղաքացիներին վարժական հավաքների կանչելու վերաբերյալ շրջանառվող կարծիքներին:
«Անկախ նրանից, թե որ երկրից են ժամանում, զինվորական հաշվառում ունեցող ցանկացած ՀՀ քաղաքացու ժամանման դեպքում, որը ֆիքսվում է համապատասխան համակարգերով, զինկոմիսարիատն իրավունք ունի էլեկտրոնային տարբերակով նրանց ուղարկել ծանուցագիր վարժական հավաքների զորակոչվելու վերաբերյալ»,-ասել է նա:
