2026 թվականի փետրվարի 7-ից կոռուպցիոն բնույթի ընտրական հանցագործությունների դեպքերի առթիվ նախաձեռնվել է 115 քրեական վարույթ, հայտնում է Հակակոռուպցիոն կոմիտեն:

Ըստ հրապարակված տեղեկատվության՝

• 77 վարույթ վերաբերել է «Ուժեղ Հայաստան» կուսակցությունների դաշինքին՝ 67 տոկոս,
• 24 վարույթ՝ «Բարգավաճ Հայաստան» կուսակցությանը՝ 20․8 տոկոս,
• 11 վարույթ՝ «Հայաստան» կուսակցությունների դաշինքին՝ 9․6 տոկոս։

Նշվում է, որ 61 քրեական վարույթով հանրային քրեական հետապնդում է հարուցվել 242 անձի նկատմամբ։

Խափանման միջոցներ են ընտրվել 220 մեղադրյալի նկատմամբ, որոնցից 100-ի դեպքում կիրառվել են ազատությունից զրկելու հետ կապված միջոցներ, մասնավորապես՝

• 52 անձի նկատմամբ ընտրվել է կալանք՝ 21.3 տոկոս,
• 48 անձի նկատմամբ՝ տնային կալանք՝ 19.7 տոկոս։

Մյուս 120 մեղադրյալի նկատմամբ կիրառվել են այլընտրանքային խափանման միջոցներ․

• 20 անձի նկատմամբ՝ վարչական հսկողություն՝ 8.2 տոկոս,
• 100 անձի նկատմամբ՝ բացակայելու արգելք՝ 41 տոկոս։

Բացի այդ, 19 անձի նկատմամբ հայտարարվել է հետախուզում, իսկ 54 անձի վերաբերյալ 14 քրեական գործ ավարտվել է մեղադրական եզրակացության կազմմամբ։

Հակակոռուպցիոն կոմիտեն հայտարարել է, որ շարունակելու է հետևողական պայքարը կոռուպցիոն բնույթի ընտրական հանցագործությունների դեմ և խիստ վերահսկողություն է իրականացնելու հետընտրական գործընթացում հնարավոր իրավախախտումների նկատմամբ։

Կառույցը նաև կոչ է արել քաղաքացիներին պահպանել օրինականությունը, ցուցաբերել պատասխանատու վարքագիծ և զերծ մնալ ընտրական գործընթացների վրա ցանկացած ապօրինի ազդեցություն գործադրելուց։

Ըստ նախնական տվյալների` ընտրություններում քվեները բաշխվել են հետևյալ կերպ․ «Քաղաքացիական պայմանագիր»՝ 49․825 տոկոս, «Ուժեղ Հայաստան»՝ 23․281 տոկոս, «Հայաստան» դաշինք՝ 9․ 934 տոկոս, «Բարգավաճ Հայաստան»՝ 3․996 տոկոս: Թարմացված տվյալներով ԲՀԿ-ն չի հաղթահարում անցողիկ շեմը, որը կուսակցության համար 4 տոկոս է, կուսակցությունը դիմել է վերահաշվարկի որոշ տեղամասերում։