Իրանի ԱԳ նախարար Աբբաս Արաղչին հայտարարել է, որ ԱՄՆ հետ ռազմական գործողությունների դադարեցման մասին համաձայնագիրը մոտ է ստորագրման և նախատեսում է Հորմուզի նեղուցի բացումը: Ըստ նրա՝ Իրանի միջուկային ծրագրի շուրջ բանակցություններն ավելի ուշ կսկսվեն, հայտնում է BBC-ն:

ԱՄՆ պաշտոնյաները հաստատել են համաձայնագրի որոշ մանրամասներ՝ նշելով, որ ստորագրումից հետո դրա տնտեսական շահավետությունն Իրանի համար կախված կլինի Թեհրանի կողմից իր պարտավորությունների կատարումից:

Հունիսի 12-ին հայտնի դարձավ, որ Թրամփը հայտարարել է, որ չեղարկել է Իրանի դեմ նախատեսված հարվածները՝ պատճառաբանելով դա բանակցային գործընթացում արձանագրված առաջընթացով և հակամարտության խաղաղ կարգավորման հնարավորությամբ։ Իրանական կողմի հետ շփումներից հետո, Թրամփի խոսքով, ձևավորվել է ռազմական հակամարտությունը դիվանագիտական ճանապարհով կարգավորելու հնարավորություն

Իրանի հետ երկու օր շարունակված փոխադարձ հարվածներից հետո ԱՄՆ նախագահ Դոնալդ Թրամփը հայտարարել է, որ ԱՄՆ-ն փաստացի ավարտին է հասցրել Իրանի հետ պատերազմական դիմակայությունը, իսկ համապատասխան համաձայնագիրը կարող է ստորագրվել արդեն առաջիկա օրերին։

Թրամփի խոսքով՝ ԱՄՆ-ից բացի, ապագա համաձայնագրի վերջնական դրույթները համաձայնեցվել են նաև «բոլոր ներգրավված կողմերի»՝ Իսրայելի, Սաուդյան Արաբիայի, ԱՄԷ-ի, Քաթարի, Թուրքիայի, Պակիստանի, Բահրեյնի, Քուվեյթի, Հորդանանի, Եգիպտոսի և մի շարք այլ երկրների հետ։

«Ծովային շրջափակումը կմնա ամբողջությամբ ուժի մեջ մինչև այս գործարքի ավարտը․ ստորագրման ժամանակն ու վայրը կհայտարարվեն մոտ ապագայում», - հավելել էր նա։

Հունիսի 10-ի երեկոյան ԱՄՆ զինված ուժերը վերսկսել էին Իրանի տարածքում գտնվող թիրախների դեմ հարվածները։

Ի պատասխան՝ Իրանը հարվածներ էր հասցրել Պարսից ծոցի երկրներում և Հորդանանում տեղակայված ամերիկյան ռազմական օբյեկտներին, այդ թվում՝ կիրառելով բալիստիկ հրթիռներ։ ՀՕՊ համակարգերի ակտիվություն և օդային տագնապի ազդանշաններ են արձանագրվել Քուվեյթում և Բահրեյնում։ Բացի այդ, Թեհրանը կրկին հայտարարել է Հորմուզի նեղուցի ամբողջական փակման մասին։ Իրանի ռազմական հրամանատարության հայտարարության համաձայն՝ ցանկացած նավ, որը կփորձի անցնել նեղուցով, կհայտնվի հարձակման թիրախում։