ԲՀԿ առաջնորդ Գագիկ Ծառուկյանը կալանավորվել է առանձնապես խոշոր չափերով խարդախություն և փողերի լվացում կատարելու մեղադրանքով։ Դատարանը բավարարել է նրան երկու ամսով կալանավորելու միջնորդությունը, հայտնում է 1lurer.am-ը:

Քննչական կոմիտեից հայտնել են, որ Գագիկ Ծառուկյանի գործով հանցավոր խմբի ևս մեկ անդամ կալանավորվել է, իսկ ևս մեկ անձ ձերբակալվել է։

ՔԿ-ն հայտնել էր, որ տվյալներ են ձեռք բերել այն մասին, որ Գագիկ Ծառուկյանի կազմակերպմամբ մի շարք անձինք 2022-2024 թվականների ընթացքում առերևույթ կատարել են առանձնապես խոշոր չափերով խարդախություն և առանձնապես խոշոր չափերով փողերի լվացում։

ՔԿ-ում քննվող մեկ տասնյակից ավելի քրեական վարույթի շրջանակում 70-ից ավելի հասցեներում նախօրեին միաժամանակյա խուզարկություններ են իրականացվել, ինչից հետո առանձնապես խոշոր չափերով խարդախություն և փողերի լվացում կատարելու մեղադրանքով Գագիկ Ծառուկյանը և հանցավոր խմբի ևս մեկ անդամ ձերբակալվել էին։