Հայ-թուրքական հարաբերությունների հարցում հարկավոր է համահայկական մոտեցում դրսեւորել: Այդ մասին Երեւանում տեղի ունեցած մամլո ասուլիսում հայտարարել է Հայոց ցեղասպանության թանգարան-ինստիտուտի տնօրեն Հայկ Դեմոյանը: «Պետք է ըմբռնումով մոտենալ սփյուռքահայերի դիրքորոշմանը, որոնք երբեմն խեղաթյուրված ու ոչ ամբողջական տեղեկություններ են ստանում իրադարձությունների զարգացման վերաբերյալ: Մենք պետք է հարգենք նրանց կարծիքը, որոնք հանդես են գալիս արմատական դիրքերից»,-ասել է Հայկ Դեմոյանը:

Նրա խոսքերով, այժմ Հայաստանը գտնվում է իր պատմության լուրջ փուլում, եւ շատ կարեւոր է , որ ամբողջ աշխարհի հայերը համատեղ ջանքերով կարողանան նվազեցնել մեր առջեւ կանգնած մարտահրավերները: «Չեմ բացառում, որ խորհրդարանական քննարկումները եւ բանավեճը երկրի ներսում այդ հարցի շուրջ օգտակար կլինեն»,-հայտարարել է Հայոց ցեղասպանության թանգարան-ինստիտուտի տնօրենը: