2010 թ. Դիլիջանում կկառուցվի միջազգային չափանիշներին համապատասխան գիշերօթիկ դպրոց, լրագրողներին հայտնեց «Ամերիաբանկի» տնօրենների խորհրդի նախագահ, «Տրոյկա դիալոգ» խմբի տնօրենների խորհրդի ղեկավար Ռուբեն Վարդանյանը: Նրա խոսքերով, դպրոցի կառուցման նախագիծը իրագործման փուլում է: «Հուսով եմ, որ մենք կկարողանանք ավարտել այս դպրոցի ստեղծման վերաբերյալ ըմբռնումների ձեւավորման գործընթացը: Չափազանց պատվախնդիր գործ է միջազգային չափանիշներին համապատասխան դպրոց կառուցելը, որտեղ կկարողանան սովորել ոչ միայն Հայաստանի, այլեւ ուրիշ երկրների երեխաները: Տեսնենք, թե ինչքանով կհաջողվի իրականացնել այն, բայց մենք ծրագրել ենք շինարարությունը սկսել 2010 թ.», - ասաց նա:

Այդ կապակցությամբ «Ամերիաբանկի» տնօրենների խորհրդի նախագահը նշեց, որ 21-րդ դարում ապագան պատկանում է նրան, ով կրթված կլինի: «Եթե մեր կրթական համակարգում բարելավումներ չլինեն, մենք կկորցնենք շատ մրցակցային առավելություններ, ինչպիսիք ունենք այսօր կամ ունեցել ենք», - ավելացրեց Ռուբեն Վարդանյանը: