Թուրքիայի վարչապետ Ռեջեփ Թայիփ Էրդողանն այսօր ելույթ կունենա Թուրքիայի Մեծ ազգային ժողովում (ԹՄԱԺ) եւ կներկայացնի «կառավարության ժողովրդավարական նախաձեռնությունները»` քրդական, հայկական եւ ալեւիտական հարցերը:

Ինչպես գրում է թուրքական Sabah թերթը, Էրդողանը խոսելու է հայ-թուրքական հարաբերությունների կարգավորման եւ այն բանի նշանակության մասին, թե որքան դրական անդրադարձ կունենա դա Թուրքիայի վարկանիշի վրա: Ինչ վերաբերում է ալեւիտներին, ապա վարչապետը մտադիր է ներկայացնել հետագա գործողությունները ալեւիտների հետ պետության հարաբերությունների կարգավորման հարցում, վերջիններս ամենամեծ կրոնական փոքրամասնությունն են (մուսուլման-շիաներ): Զանազան գնահատականներով ալեւիտների թիվը հասնում է 10-14 մլն հոգու (բնակչության 20%):

Ինչ վերաբերում է «քրդական նախաձեռնությանը», ապա Էրդողանի խոսքով, այն պետական քաղաքականության բաղկացուցիչ մասն է: Էրդողանը խոսելու է արյունահեղության դադարեցման եւ հիմնախնդիրը խաղաղ ճանապարհով լուծելու անհրաժեշտության մասին:

Քրդական բնակչության (20-25 մլն) եւ Թուրքիայի միջեւ պատերազմը շարունակվում է 30 տարի, որի ընթացքում երկու կողմերից զոհվել է մոտ 40 հազար մարդ: