2010 թվականի սկզբին ԱՄՆ Ներկայացուցիչների պալատի արտաքին հարաբերությունների հանձնաժողովում կակտիվանան Հայոց ցեղասպանության բանաձեւի քննարկումները: Այդ մասին Երեւանում տեղի ունեցած մամլո ասուլիսում հայտարարել է ԱՄՆ-ից վերադարձած ՀՅԴ Գերագույն մարմնի ներկայացուցիչ, ՀՀ ԱԺ արտաքին հարաբերությունների հանձնաժողովի նախագահ Արմեն Ռուստամյանը:

Ըստ պատգամավորի, ամերիկացի կոնգրեսականների եւ ԱՄՆ պետքարտուղարի տեղակալ Ֆիլիպ Գորդոնի հետ հանդիպումների ընթացքում նա հայտարարել է, որ Հայաստանի եւ Թուրքիայի միջեւ առկա գործընթացը չպետք է խանգարի Հայոց ցեղասպանության միջազգային ճանաչմանը եւ չպետք է պայմանավորվի Արձանագրություններով:

«Դրա ամենավառ վկայությունը կարող է դառնալ Հայոց ցեղասպանության ճանաչումը ԱՄՆ Կոնգրեսի կողմից»,-ասել է Արմեն Ռուստամյանը: Ըստ խորհրդարանականի, եթե ԱՄՆ-ն ճանաչի Հայոց ցեղասպանությունը, երկու խնդիր կլուծվի` պարզ կդառնա, որ այդ պատմական փաստի ճանաչումը հակաթուրքական արշավ չէ, այն կկանխի ապագա ցեղասպանությունները:

«Ամերիկյան կողմի հետ հանդիպման ժամանակ ես զգացի, որ նրանք այդ մոտեցումն ըմբռնումով են ընկալում: Եվ հենց այդ պատճառով ես անհրաժեշտ եմ համարում նոր խթան հաղորդել Հայոց ցեղասպանության միջազգային ճանաչման շարժմանը»,-ասել է Արմեն Ռուստամյանը:

Թիվ 252 բանաձեւը ներկայացվել է 2009թ. մարտի 17-ին կոնգրեսականներ Ադամ Շիֆի եւ Ջորջ Ռադանովիչի կողմից: Այդ բանաձեւին սատարում է 135 կոնգրեսական: