Հայաստանը լավ հարաբերություններ է պահպանում եւ ԱՄՆ-ի, եւ Ռուսաստանի հետ: Հայաստանն ու Ռուսաստանը զարգացնում են ռազմավարական գործընկերությունը: Այդ մասին արաբական Al Jazeera հեռուստաալիքին տված հարցազրույցում հայտնեց Հայաստանի նախագահ Սերժ Սարգսյանը: «Միացյալ Նահանգներում բնակվում են բազմաթիվ հայեր, որոնք բնական կամուրջ են հանդիսանում մեր եւ Միացյալ Նահանգների միջեւ հարաբերություններում: Եվ մեզ համար լավագույն վիճակն այն է, երբ Միացյալ Նահանգների եւ Ռուսաստանի միջեւ լավ հարաբերություններ են լինում»,- նշեց ՀՀ ղեկավարը:
Սերժ Սարգսյանն ընդգծեց, որ ամբողջ աշխարհում ապրող բազմաթիվ հայեր օժանդակում են Հայաստանին, բայց հիանալի կլիներ, եթե նրանք հայրենիք վերադառնային:
Խոսելով ԱՄՆ կողմից Հայոց ցեղասպանության ճանաչման մասին` Հայաստանի նախագահը հայտնեց, որ ցեղասպանության ճանաչումն արդարության ճանաչումն է: Սերժ Սարգսյանի կարծիքով, ԱՄՆ նախագահ Բարաք Օբաման բառացիորեն ասել է, որ չի փոխել իր կարծիքն այդ հարցի վերաբերյալ:
