Մարտի 3-ին Ամերիկայի հայկական թանգարանում եւ գրադարանում (ALMA) «Ամարաս» գեղարվեստական միությունը կներկայացնի Ազատ Ֆիշյանի համերգը: Համերգի ընթացքում երաժիշտը կնվագի Բախի, Բեթհովենի, Պրոկոֆեւի, Կոմիտասի եւ այլ կոմպոզիտորների ստեղծագործությունները: Ազատ Ֆիշյանին նվագակցելու է դաշնակահար Դանիել Պաթգետը, հաղորդում է ALMA -ի պաշտոնական կայքէջը:

Ազատ Ֆիշյանը յոթ տարեկանում ընդունվում է Երեւանի Սայաթ-Նովայի անվան երաժշտական դպրոցի ջութակի դասարան: 12 տարեկանում «Խաչատրյան» միջազգային մրցույթին մասնակցելով` գրավում է երրորդ տեղը: 15 տարեկանում Յուրի Բախշյանի կամերային նվագախմբում հանդես է գալիս որպես մենակատար եւ հանդես է գալիս Երեւանի, Բոստոնի, Լոս Անջելեսի բեմերում:

2007 թ. նա տեղափոխվում է ԱՄՆ, որտեղ երաժշտական կրթությունը շարունակում է Longy երաժշտական դպրոցում` Բոստոնի սիմֆոնիկ նվագախմբի կոնցերտմեյստեր Մալքոլմ Լոուի հովանավորությամբ: Ավելի ուշ նա սովորում է Լոս Անջելեսում հայտնի ուսուցիչ եւ կատարող Հովսեփ Քեթենջյանի մոտ:

2009 թ. Ազատ Ֆիշյանը «Ռիչարդ Բ. Ֆիսկ» երիտասարդ կատարողների մրցույթում դառնում է առաջին մրցանակի մրցանակակիր: 2010 թ. նա Նյու Վալի սիմֆոնիկ նվագախմբի կազմում հանդես է գալիս համերգի կատարումով: