“Մեր երկրների միջև հարաբերությունները չեն կարող զարգանալ առանց շոշափելու նաև միջխորհրդարանական համագործակցությունը”,- ասել է Հովիկ Աբրահամյանը Լիբանանի խորհրդարանի նախագահ Նաբիհ Բըրրիի հետ հանդիպման ժամանակ:
ՀՀ Ազգային ժողովի նախագահը փաստել է, որ երկու երկրները մեծ հաջողություններ են արձանագրել նաև միջազգային տարբեր ատյաններում փոխշահավետ համագործակցության առումով: Երկու երկրները միջազգային կառույցներում աջակցել են միմյանց Հայաստանի և Լիբանանի համար կարևոր հարցերում: Նա բարձր է գնահատել նաև եղբայրական վերաբերմունքը լիբանանահայության նկատմամբ:
Հովիկ Աբրահամյանն ասել է, որ Հայաստանում ջերմությամբ են հիշում 1997 թվականին Նաբիհ Բըրրիի` Հայաստան կատարած այցը և բարձր են գնահատում այն: ՀՀ Ազգային ժողովի նախագահը լիբանանցի իր գործընկերոջը հրավիրել է նրա համար նախընտրելի ժամկետներում կրկին այցելել Հայաստան:
ՀՀ Ազգային ժողովի նախագահը շնորհակալություն է հայտնել, որ հիշյալ այցի ժամանակ Լիբանանի խորհրդարանի նախագահը կարևորել է Լեռնային Ղարաբաղի խողովրդի ինքնորոշման իրավունքը: Այս կապակցությամբ Հովիկ Աբրահամյանը շեշտել է, որ Լեռնային Ղարաբաղը չի կարող լինել Ադրբեջանի կազմում, հաղորդում է ՀՀ ԱԺ հասարակայնության և տեղեկատվության միջոցների հետ կապերի վարչությունը:
