Ապրիլի 15-ին ՀՀ սփյուռքի նախարար Հրանուշ Հակոբյանի նախագահությամբ կայացավ “Մեկ ազգ, մեկ մշակույթ” համահայկական մշակութային փառատոնի շրջանակներում կերպարվեստի օրերի անցկացման կազմակերպական կոմիտեի նիստ: Ներկա էին Հայաստանի նկարիչների միության նախագահ Կարեն Աղամյանը, Երևանի գեղարվեստի ակադեմիայի ռեկտոր Արամ Իսաբեկյանը, “Մեկ ազգ, մեկ մշակույթ” հիմնադրամի գործադիր տնօրեն Թամարա Պողոսյանը, քանդակագործ Լևոն Թոքմաջյանը, լիբանանահայ նկարիչ Սոնյա Տաշջյանը և նախարարության` կազմկոմիտեի անդամ-աշխատակիցներ:
Ողջունելով ներկաներին` նախարար Հ. Հակոբյանը խոսել է այս տարվա հունիսի վերջին “Հայ նկարիչների և քանդակագործների համահայկական համաժողով” կազմակերպելու նախագծի մասին: Այնուհետև ներկաները հանդես են եկել առաջարկություններով և հարցեր են ուղղել տիկին Հակոբյանին:
Նախարարն առաջարկել է ստեղծել “Կերպարվեստի համահայկական ընկերակցություն”, որի արդյունքում ոչ միայն առավել սերտ կլինի սփյուռքահայ արվեստագետների կապը հայրենիքի հետ, այլ նաև հնարավորություն կստեղծվի միմյանց ճանաչելու և ակտիվ համագործակցելու: Տիկին Հակոբյանը կարևորել է երիտասարդ արվեստագետների դերը` առաջարկելով ստեղծվելիք ընկերակցության կազմում նրանց համար ունենալ առանձին բաժին:
