Ապրիլի 19-ին տեղի է ունեցել Հայաստանի ազգային օլիմպիական կոմիտեի նախագահ Գագիկ Ծառուկյանի հանդիպումը Հայաստանի հոկեյի հավաքականի ներկայացուցիչների հետ: Հանդիպմանը ներկա է եղել նաև ՀՀ սպորտի և երիտասարդության հարցերի նախարար Արթուր Պետրոսյանը:
Մարզաշխարհի ներկայացուցիչների անունից Գագիկ Ծառուկյանը ողջունել է հավաքականի անդամներին, շնորհավորել նրանց տափօղակով հոկեյի աշխարհի առաջնության 3-րդ դիվիզիոնի Բ խմբի մրցաշարի խաղերին փայլուն մասնակցություն ցուցաբերելու կապակցությամբ: Գագիկ Ծառուկյանը շեշտել է, որ բոլորի համար անակնկալ էր Հայաստանի հոկեյի հավաքականի հաջողությունը և ընդհանրապես Հայաստանում հոկեյի մրցաշար անցկացնելու փաստն ինքնին:
Գագիկ Ծառուկյանը և իր կողմից պատրաստակամություն է հայտնել մշտապես աջակցել հավաքականին և հավատացրել, որ հետևողական է լինելու այդ հարցում: Հանդիպման ավարտին Գագիկ Ծառուկյանը Հայաստանի հոկեյի հավաքականին է հանձնել Հայաստանի ազգային օլիմպիական կոմիտեի գավաթը: Հավաքականի անդամները նաև օլիմպիական համազգեստներ են ստացել, ասվում է ՀՀ սպորտի և երիտասարդության հարցերի նախարարության պաշտոնական կայքէջում:
