Հայ-թուրքական հարաբերությունների կարգավորման գործընթացում մինչ Թուրքիայում կայանալիք խորհրդարանական ընտրություններն առաջխաղացում ակնկալել հարկավոր չէ: Այդ մասին Երևանում տեղի ունեցած մամլո ասուլիսում հայտարարել է Կովկասի ինստիտուտի տնօրեն, քաղաքագետ Ալեքսանդր Իսկանդարյանը: Ըստ նրա, ներքաղաքական մթնոլորտը Թուրքիայում այժմ թույլ չի տա իշխող կուսակցությանը քայլեր կատարել Հայ-թուրքական արձանագրությունների վավերացման ուղղությամբ:
Անդրադառնալով վերջին գործընթացներին թուրք-իսրայելյան փոխհարաբերություններում` քաղաքագետը նշել է, որ «Ազատության նավատորմի» բռնագրավումը չի հանգեցնի պատերազմի, սակայն Անկարային պետք են աղմկոտ սկանդալներ Իսրայելի հետ:
«Թուրքիան փորձում է փոխել քաղաքականությունը Մերձավոր Արևելքում, և վերջերս, մենք տեսնում ենք Անկարայի ակտիվությունը ինչպես Սիրիայի, այնպես էլ Իրանի ու Իրաքի հետ հարաբերություններում: «Մերձավոր Արևելքում ավելի ակտիվանալու և արաբական երկրների հետ ընկերանալու համար, պետք է հարաբերությունները փչացնել Իսրայելի հետ»,-ասել է քաղաքագետը` հավելելով, որ, հավանաբար, «Ազատության նավատորմը» բոլորովին այլ նպատակներ էր հետապնդում, քան հումանիտար բեռների փոխադրումն է: Քաղաքագետն ընդգծել է, որ հավանաբար, իրավիճակը կսրվի, քանի որ Թուրքիան դա է ուզում: «Այդ դեպքում Հայոց ցեղասպանության մասին բանաձևի ընդունման հավանականությունն Իսրայելի Քնեսեթում կաճի»,-ասել է Կովկասի ինստիտուտի տնօրենը:
