Մոսկվայում տեղի է ունեցել «Հայաստան-Իրան. պատմություն, մշակույթ, զարգացման հեռանկարներ» գիտաժողովը: Ինչպես PanARMENIAN.Net-ին է հայտնել Ռուս-հայկական համագործակցության նախագահ Յուրի Նավոյանը, գիտաժողովն անցել է ՄՊՀ-ին կից Ասիայի ու Աֆրիկայի երկրների ինստիտուտում Վլադիմիր Իվանովի նախագահությամբ: Մասնակցել են ՌԴ, Իրանի ու Եվրոպայի գիտամշակութային ընկերակցության ներկայացուցիչները:
Գիտաժողովի առաջին նստաշրջանը բացեց Հայ Առաքելական եկեղեցու Թեհրանի թեմի խորհրդական Հենրիկ Խալոյանը: Խալոյանը ներկայացրել է Իրանի հայ համայնքը: Նա նշել է, որ Իրանի հայկական համայնքը վաղեմի պատմություն ունի: Խալոյանն ընդգծել է, որ Իրանում պաշտոնապես երեք ազգային փոքրամասնություն է ճանաչված, որից ամենախոշորը հայկական համայնքն է: Իրանում գործում են Անթիլյասի կաթողիկոսության երեք թեմեր, բազմաթիվ դպրոցներ, մշակութային, մարզական և հասարակական միություններ: Արդեն 80 տարի է հրատարակվում է «Ալիք» օրաթերթը: Հայերը երկու պատգամավորական տեղ ունեն Իրանի խորհրդարանում: Իրանը միշտ բարեկամաբար է վերաբերվել հայերին: Այդ մասին, մասնավորապես, վկայում է Իրանի խնամքով վերաբերմունքը հայ մշակութային ժառանգությանը այդ պետության տարածքում` ի տարբերություն Թուրքիայի ու Ադրբեջանի, որտեղ քանդվում են հայկական պատմական հուշարձանները: Հենրիկ Խալոյանն ընդգծել է հայ համայնքի դրական դերը հայ-իրանական հարաբերություններում:
«Արարատ» մշակութալուսավորչական ընկերակցության նախագահ Էմանուել Դալբակյանը Լազարյանների ընտանիքի օրինակով պատմել է Ռուսական կայսրության պարսկահայ ընտանիքների մասին:
Երկրորդ նստաշրջանը բացեց Ռուս-հայկական համագործակցության նախագահ Յուրի Նավոյանը: Նա ներկայացրեց արդի հայ-իրանական կապերը` ընդգծելով, որ համագործակցությունը Հայաստանի ու Իրանի միջև կայունության և հավասարակշռության գործոն է տարածաշրջանում:
Գիտաժողովի մասնակիցները համակարծիք էին այն հարցում, որ իրանահայ գիտնականները արժանի ավանդ ունեն իրանական գիտության մեջ: Համաժողովի աշխատանքը հաջողված համարվեց:
