Հայաստանը սկսել է հայ-թուրքական հարաբերությունների գործընթացն առանց նախապայմանների և դադարեցրել է այն միայն այն ժամանակ, երբ թուրքական կողմը սկսել է իր պայմաններն առաջադրել: Այդ մասին Երևանում մամլո ասուլիսում հայտարարել է իշխող Հայաստանի Հանրապետական կուսակցության (ՀՀԿ) պատգամավոր Մկրտիչ Մինասյանը: «Եթե թուրքական կողմը շարունակի իր քաղաքականությունը, ապա մենք ստիպված կլինենք ետ կանչել Արձանագրությունների տակ դրված մեր ստորագրությունը»,- ասել է Մինասյանը:
Պատգամավորի խոսքերով, ԱՄՆ պետքարտուղար Հիլարի Քլինթոնի այցից հետո թուրքական կողմը սկսեց հարաբերությունների կարգավորմանն ուղղված ինչ-որ քայլեր անել: «Նման քայլ կարելի է համարել Կարսի նահանգապետի հայտարարությունը հայ-թուրքական սահմանի բացման մասին: Բայց ես կարծում եմ, որ դա ուղղակի իմիտացիա է և ուրիշ ոչինչ»,- ասել է նա:
