Հուլիսի 15-ին ՀՀ հասարակական խորհրդի երիտասարդական ենթահանձնաժողովի հատուկ նիստում քննարկվել է ՀՀ հասարակական խորհրդի նախագահ Վազգեն Մանուկյանի` խորհրդի անդամներին բաց նամակով ուղարկած առաջարկությունը:
Երիտասարդական ենթահանձնաժողովը, մասնավորապես, քննարկել է մի շարք առավել արդիական`բանակի և կրթության հարցերը և հավանության է արժանացրել 18 տարին լրացած երիտասարդների (բացառությամբ առողջական խնդիրներ ունեցող երիտասարդների) պարտադիր զինծառայության մասին առաջարկը, ըստ որի զինծառայության ժամկետը կրճատվելու է մինչև 1,5 տարի:
Ենթահանձնաժողովը նաև առաջարկել է զինծառայությանը զուգահեռ պարտադիր ուսուցանել` հայերեն, ռուսերեն, անգլերեն, Հայ ժողովրդի պատմություն և մաթեմատիկա առարկաները: Այս առարկաներից երիտասարդները քննություն պետք է հանձնեն բուհ ընդունվելիս և, խորհրդի անդամների կարծիքով, բանակում ուսումնառությունը խթան կլինի նրանց համար ուսումը բուհերում շարունակելու:
«Յուրաքանչյուր պետություն ուժեղ է իր բանակով և հայկական բանակը հզորանալու է միայն բարեփոխումների շնորհիվ», - ասել է ՀՀ հասարակական խորհրդի ենթահանձնաժողովի նախագահ Հռիփսիմե Մարգարյանը:
