Արցախի Հանրապետության նախագահ Բակո Սահակյանն օգոստոսի 13-ին այցելել է Մարտունու շրջանի Զարդանաշեն գյուղ և հանդիպել համայնքի ներկայացուցիչների հետ
Հանդիպման ընթացքում քննարկվել է գյուղի զարգացմանն առնչվող հարցերի լայն շրջանակ: Հատուկ ուշադրություն է դարձվել զբաղվածության, ոռոգման ցանցի զարգացման և ճանապարհների բարեկարգման հիմնախնդիրներին:
Երկրի ղեկավարը նշել է, որ գյուղի զարգացումը հանդիսանում է ռազմավարական նշանակություն ունեցող ուղղություն, որից մեծապես կախված է հանրապետության սոցիալ-տնտեսական կայուն զարգացումը:
Այս համատեքստում Բակո Սահակյանը կարևորել է տեղում ցուցաբերվող նախաձեռնողականությունը՝ նշելով, որ դրա բացակայությունը ցանկացած ծրագրի իրականացման գործում հանդիսանում է ամենամեծ խոչընդոտներից մեկը:
Նախագահին ուղեկցում էր գրող-հրապարակախոս Արցախի հերոս Զորի Բալայանը, պաշտոնատար այլ անձինք, հաղորդում է Արցախի Հանրապետության նախագահի աշխատակազմի տեղեկատվության գլխավոր վարչությունը:
