«ԱրմենՏել» ընկերությունը (ապրանքանիշը Beeline) հայտարարում է, որ ռոումինգ ծառայության ակտիվացումը Լեռնային Ղարաբաղում այսուհետ կկատարվի ավտոմատ կերպով նոր համակարգի ներդրման շնորհիվ: Այս ծառայությունը գործում է Beeline շարժական կապի հետվճարային համակարգի բաժանորդների համար, երբ վերջիններս գտնվում են Ղարաբաղ Տելեկոմի ցանցում:
«Շարունակաբար զարգացնելով ծառայությունների տրամադրման համակարգը` «ԱրմենՏել» ընկերությունը հաճախ անակնկալներ է մատուցում իր բաժանորդներին գների տեսանելի իջեցման կամ տվյալ ծառայությունից օգտվելու առավելագույն հարմարավետություն ապահովելու տեսքով: Այժմ միասնական օպերատորի բաժանորդները Լեռնային Ղարաբաղ մեկնելուց առաջ ստիպված չեն լինի անհանգստանալ ռոումինգ ծառայությունը նախապես ակտիվացնելու համար»,- նշեց «ԱրմենՏել» ընկերության Գլխավոր տնօրեն Իգոր Կլիմկոն:
Նշենք, որ Լեռնային Ղարաբաղում ռոումինգ ծառայության ակտիվացման արժեքը նախկինում կազմում էր 15000 դրամ ֆիզիկական և 30.000 դրամ իրավաբանական անձանց համար: Ողջ գումարը փոխանցվում էր բաժանորդի հաշվեկշռին:
Երբ Դուք գտնվում եք Հայաստանի տարածքում Լեռնային Ղարաբաղի սահմանին մոտ ռոումինգ ծառայության չարտոնված օգտագործումից խուսափելու համար «ԱրմենՏել» ընկերությունը խորհուրդ է տալիս իր բաժանորդներին օգտվել հեռախոսի մենյուի մեջ ցանցը փնտրելու մեխանիկական եղանակից և ընտրել Beeline բջջային ցանցը, հաղորդում է«ԱրմենՏել» ընկերության մամլո ծառայությունը: