Սեպտեմբերի 4-ին Երևանի «DDD» մարզահամալիրում «Սպորտով դեպի հասարակություն» նշանաբանի ներքո մեկնարկեց Հենաշարժողական համակարգի խնդիրներով մարզիկների ՀՀ լողի առաջնությունը: Առաջնությունը կազմակերպել էր Հաշմանդամային սպորտի հայկական ազգային ֆեդերացիան Հայաստանի լողի ազգային դաշնության հետ համատեղ: Այն սկսվեց հանդիսավոր քայլերգով և պաշտոնական բացման արարողությամբ: Առաջնությանը մասնակցում էին թվով քսան ֆիզիկական հաշմանդամություն ունեցող մարզիկներ ՀՀ մարզերից և Արցախից: Համաձայն երկօրյա առաջնության կանոնադրության, մարզիկները մրցաշարի առաջին օրն իրենց ուժերը չափեցին չորս լողատարածությունում` 50մ բրաս, 25մ ազատ ոճ, 50մ թիկնալող և 100մ ազատ ոճ: Դեռ առջևում է մրցակցային ևս մեկ օր` չորս լողատարածություններով ու պարգևատրման հանդիսավոր արարողությամբ: Բոլոր հաղթողներն ու մրցանակակիրները կպարգևատրվեն մեդալներով ու պատվոգրերով: Այս առաջնությունը անդրանիկն է անցկացվելիք հինգ հաշմանդամային հանրապետական առաջնություններից, որոնք ներառվում են Եվրոպական միության կողմից ֆինանսավորվող սպորտային ծրագրում, հաղորդում է Հաշմանդամային սպորտի ֆեդերացիայի մամլո ծառայությունը:
