Եթե, ինչպես Ադրբեջանն է պնդում, ԼՂՀ և նրա հարակից տարածքները գտնվում են Հայաստանի վերահսկողության ներքո, ապա ինչո՞ւ է հրադադար հաստատելու համար եռակողմ համաձայնագիր կքնվել: «Չիրագովն ու մյուսներն ընդդեմ Հայաստանի» գործի քննության ընթացքում նշված հարցն ադրբեջանցի դիմումատուներին ու Ադրբեջանի կառավարության ներկայացուցիչներին ուղղեց Մարդու իրավունքների եվրոպական դատարանի դատավոր, նիդերլանդացի Էգբերտ Մայերը:
Մինչ այդ հնչած ելույթներում Հայաստանի ներկայացուցիչ Գևորգ Կոստանյանն անդրադարձել էր խնդրին ու փաստարկված ներկայացրել, որ ԼՂՀ և նրա հարակից տարածքում արդյունավետ վերահսկողություն իրականացնում են միայն ԼՂՀ իշխանությունները:
«Չիրագովն ու մյուսներն ընդդեմ Հայաստանի» գործով Ստրասբուրգում ընթացող լսումներին ադրբեջանցի հիմնական դիմումատուն չի մասնակցում: Քննարկումներին մասնակցելու նպատակով Էլհան ու Ադիշիրին Չիրագովները ժամանել են Եվրոպա, սակայն Ստրասբուրգ չեն հասել: Շրջանառվող տեղեկատվության համաձայն` Չիրագովները Փարիզից մեկնել են ոչ թե Ստրասբուրգ, այլ Դյուսելդորֆ:
Գործի քննության ժամանակ ադրբեջանցիներից ներկա են գտնվել երկուսը` Ակիֆ Հասանովը և Ֆեհրեդին Փաշաևը:
Հիշեցնենք, որ Ստրասբուրգում այսօր մեկնարկել են «Չիրագովն ու մյուսներն ընդդեմ Հայաստանի» և «Սարգսյանն ընդդեմ Ադրբեջանի» գործերով լսումները:
